A Comunidat de Treballo d’os Pirineus (CTP) da treslau d’os problemas y obstaclos buegatizos que vive cada diya a poblazión d’o territorio pirinenco con motivo d’a trobada franco-española que se zelebrará en Barcelona o 19 de chinero.
En iste sentiu, a CTP estima que ista trobada brinda una oportunidat optima ta que sigan presos en considerazión os prenzipals alcuerdos alcanzaus en o 40º Consello Plenario zelebrau o pasau 30 de noviembre en Arantzazu (Gipuzkoa). En iste evento, os representans d’os siete territorios que forman parti d’a CTP, Euskadi, Navarra, Aragón, Catalunya, Nouvelle Aquitaine, Occitanie y Andorra, apreboron a Declarazión d’os suyos presidens en a cuala se replega, entre atros alcuerdos, os siguiens:
- A nezesidat d’a obredura d’os pasos buegatizos bloquiaus dende chinero de 2021 por as autoridaz franzesas, reivindicazión plenamén compartida por o conchunto d’actors d’o espazio transbuegatizo, implicaus y consziens que cal seguir afondando en a constituzión d’una ziudadanía transbuegatiza plenamén integrada.
- A nezesidat ineludible de definir y aplicar o Mecanismo Europeu de Cooperazión Transbuegatiza (ECBM) como instrumento que contribuiga a resolver os obstaclos legals y administrativos a los cuals ha de fer fren o territorio transpirinenco. S’insta a los Estaus español y franzés, asinas como a la Comisión Europea a seguir ista vía, buscando consenso.
- O refirme a lo desembolique d’as infraestruturas transpirinencas que contribuyirán a diversificar as prozedenzias d’o fornimiento enerchetico, asinas como a fomentar a descarbonización por medio de l’uso de fuens d’enerchía renovables, como l’hidrocheno verde y o biometano. Amás, o Consello Plenario reclama que as Rechions y Comunidaz Autonomas sigan incorporadas a los prozesos de dezisión
- O suyo compromís ta empentar l’adopzión d’un Protocolo de cooperazión transpirinenca ta la promozión de l’hidrocheno renovable, con l’obchetivo de crear un espazio transbuegatizo de desplegue d’a economía de l’hidrocheno, reforzando o posizionamiento d’os territorios y permitindo-les alcanzar os obchetivos de descarbonización fixaus en as estratechias estatals y europeas.
A Declarazión completa do i se meten de manifiesto istos asuntos ye disponible en a pachina web d’a CTP:
- Euskara https://ctp.org/wp-content/uploads/2023/01/DECLARACION_CONSEJO_PLENARIO_2022_VF_EU.pdf
- Español https://ctp.org/wp-content/uploads/2023/01/DECLARACION_CONSEJO_PLENARIO_2022_VF_ES.pdf
- Catalán https://ctp.org/wp-content/uploads/2023/01/DECLARACION_CONSEJO_PLENARIO_2022_VF_CA.pdf
- Francés https://ctp.org/wp-content/uploads/2023/01/DECLARATION_CONSEIL-PLENIER-2022_VF_FR.pdf
- Occitano https://ctp.org/wp-content/uploads/2023/01/DECLARACION_CONSEJO_PLENARIO_2022_VF_OC.pdf
Os miembros d’a CTP consideran que a reunión entre os Gubiernos español y franzés constituye una oportunidat eszelén ta l’enfortimiento d’as relazions entre toz os dos Estaus arredol d’istas cuestions, y manifiestan a suya disposizión a contribuyir, dende as suyas respeutivas competenzias, a lo debate y a colaborazión ta abanzar en as prioridaz d’os territorios pirinencos.