La Comunautat de Trabalh dels Pirenèus (CTP) met sus la taula los problèmas e los obstacles frontalièrs que viu cada jorn la populacion del territòri pirenenc a l’escasença del cimèl francoespanhòl que se debanarà a Barcelona lo 19 de genièr.

Dins aqueste sens, la CTP considera qu’aqueste cimèl ofrís una escasença excellenta per que sián preses en consideracion los principals acòrdis obtenguts dins lo 40n Conselh Plenari celebrat lo 30 de novembre passat a Arantzazu (Guipuscoa). Dins aqueste eveniment, los representants dels sèt territòris que fan partida de la CTP, Euskadi, Navarra, Aragon, Catalonha, Nòva Aquitània, Region Occitània e Andòrra, aprovèron la Declaracion de lors presidents que rapòrta, entre d’autres acòrdis, los seguents:

  • Lo besonh de la dobertura dels passatges frontalièrs blocats dempuèi genièr de 2021 per las autoritats francesas, revendicacion plenament partejada per l’ensems d’actors de l’espaci transfrontalièr, concernits e conscients qu’es necite contunhar d’aprigondir en la constitucion d’un ciutadanitge transfrontalièr plenament integrat.
  • Lo besonh ineluctable de definir e aplicar lo Mecanisme Europèu de Cooperacion Transfrontalièra (ECBM) coma aisina que contribuïsca a resòlver los obstacles legals e administratius que deu acarar lo territòri transpirenenc. Òm fa apèl als Estats espanhòl e francés, ansin qu’a la Comission Europèa a seguir aquesta draia, en cercant lo consensus.
  • Lo sosten al desvolopament de las infrastructuras transpirenencas que contribuïràn a diversificar las procedéncias del provesiment energetic, e tanben a fomentar la descarbonizacion mejançant l’emplec de fonts d’energia renovelabla, coma l’idrogèn verd e lo biometan. A mai, lo Conselh Plenari reclama que las Regions e las Comunautats Autonòmas sián incorporadas als procèsses de decision
  • Lo sieu engatjament per impulsar l’adopcion d’un Protocòl de cooperacion transpirenenca per la promocion de l’idrogèn renovelable, amb la tòca de crear un espaci transfrontalièr de desplegament de l’economia de l’idrogèn, en tot refortir lo posicionament dels territòris e en lor permetent d’aténher los objectius de descarbonizacion determinats per las estrategias estatalas e europèas.

La Declaracion complèta ont se meton en evidéncia aqueles subjèctes es disponibla sus la pagina web de la CTP:

Los membres de la CTP considèran que la reünion entre los Govèrns espanhòl e francés constituís una escasença excellenta pel refortiment de las relacions entre ambedós estats per çò d’aquestes subjèctes, e manifèstan la siá disposicion a contribuir, dempuèi lors respectivas competéncias, al debat e a la collaboracion per far avant en las prioritats dels territòris pirenencs.

Aguest comunicat de premsa pòt descargar-se eth PDF ací.