Los 6, 7 e 8 d’octobre, l’Agéncia deus Pirenèus e l’associacion « Ua mèrca entaus Pirenèus », qui vien de cambiar de nom entà vàder « Agòra Pirenèus », qu’an organizat un encontre deus actors pirenencs dens la vila bearnesa d’Auloron Senta Maria.
Mei de 500 personas qu’an participat a l’eveniment, qui a favorizat lo sentiment d’apartenéncia au territòri. Aquera dusau edicion de Pyrénéo qu’a vist la signatura de la convencion enter l’Estat francés e las duas regions Navèra Aquitània e Occitània entau desvolopament duradís deus Pirenèus, dotada d’un budget de 160 milions d’euros entau periòde 2021-2027.
La cooperacion transfrontalèra au còr de la region Pyrénéo
Pendent la session principau, consacrada a la cooperacion transfrontalèra, lo director deu CTP, Jean-Louis Valls, qu’a avut lo parat de presentar las òbras deu Consòrci. Puish, Idoia Arauzo, remplaçant Eva García Balaguer, qu’a presentat l’Observatòri pirenenc deu cambiament climatic . Dens la medisha session, mantun projècte finançat peu programa Interreg POCTEFA que son estats presentats, taus com AVIÉNER, ENTREPYR, ARTIS o APTITUD. L’iniciativa de la Rota deu hèr transpirenenca qu’ei egaument estada presentada, atau com ua iniciativa de cooperacion enter las escòlas gràcias a la quau cors son dispensats en francés, en espanhòu e en basco.
En aqueth esgard, Mathieu Bergé, conselhèr regionau de Novèla Aquitània, qu’a demandat l’obertura de las pòstas frontèras qui son estats barrats pendent la pandemia e qui ac son tostemps. Qu’a egaument encoratjat las autoritats a aplicar lo mecanisme de cooperacion transfrontalèra peu quau la Comission europèa apròva la possibilitat d’aplicar la legislacion de l’Estat membre la mei favorabla en cas d’obstacles administratius a las frontèras. Fin finau, qu’a evocat l’estatut de la ciutadanetat transfrontalèra e l’importància de l’aprendissatge de las lengas, deus transpòrts publics transfrontalèrs e de la reconeishença deus diplòmas.
