Grop de trabalh idrogèn
Lo grop de trabalh sus l’idrogèn de la Comunautat de Trabalh dels Pirenèus es un gropament de personas expèrtas dins aqueste domeni e originàrias de cadun dels sèt territòris de la CTP e que foguèron designadas per sos govèrnaments respectius.
Dins l’Estrategia Pirenenca (2018-2024), se fa mencion al naut potencial de desvolopament de las energias renovelablas, aital coma a la creacion d’una CTP scientifica que pòrte sul domeni energetic. Es per aquò, aital coma per l’interès dels mèmbres de la CTP de se desvolopar dins aquesta matièra, en 2020 se decidèt per l’escomesa de crear un grop de trabalh especific.
L’idrogèn es pas una font d’energia, mas un vector energetic – es a dire, deu èsser fabricat abans d’èsser utilizat. A l’ora d’ara, en Euròpa, l’idrogèn representa mens de 2% de la consomacion d’energia e es utilizat mai que mai per fabricar de produches quimics. 96% d’aqueste idrogèn es fach per de gas. L’estrategia de l’UE per l’idrogèn explòra lo potencial de l’idrogèn per ajudar a descarbonizar l’UE d’un biais eficaç.
Lo desvolopament de la cadena de valor de l’idrogèn, dempuèi sa produccion, estocatge, distribucion, aplicacion, usatge e d’autres aspèctes (coma la formacion o lo desvolopament d’una legislacion) presentan un larg ventalh d’escasenças per d’afars, de cooperacion e tanben d’escomesas pel sector privat emai per çò public.