Lo Comitat executiu de la Comunautat de trabalh dels Pirenèus aprovèt l’aviament d’un grop de trabalh sus l’economia circulara. En amassar de personas coneisseiras dins la matèria per representar cadun dels sèt territòris de la CTP, aqueste grop s’inserís dins lo cadre de las tòcas que la CTP se donèt dins son Estrategia pirenenca (2018-2024).

Aital coma explica lo Parlament Europèu, se contunham a explechar las ressorças coma o fasèm a l’ora d’ara, en 2050 aurem besonh de las ressorças de tres planetas Tèrra. Las ressorças finidas e los problèmas climatics demandan que se meta en plaça una economia neutra en carbòni, ecologicament duradissa, liura de toxics e completament circulara cap a 2050.

La crisi actuala a mes en evidéncia las debilitats de las ressorças e las cadenas de valor, tot en impactar las PMEs e l’industria. Una economia circulara demesirà las emissions de CO2, mentre qu’estimularà la creissença economica e crearà una nòva ofèrta d’emplecs.

Alavetz, aqueste grop de trabalh d’economia circulara qu’organiza la CTP es en linha amb la tòca de neutralitat climatica de l’UE cap a 2050 e amb lo Plan d’accion d’economia circulara centrat sus la prevencion e la gestion de residús e destinat a sosténer la creissença, la competitivitat e la direccion mondiala de l’UE dins aqueste domeni.

Mai d’informacions: