Lo dimars 23 de març, membres del programa POCTEFA e de la Comunautat de Trabalh dels Pirenèus s’amassèron amb d’estudiants de geografia de l’Universitat de Pau.
La tòca èra de far assabentar melhor sus un organisme fondamental de la coesion europèa e de las oportunitats professionalas d’un territòri transfrontalièr. Los estudiants descobriguèron las diferentas missions del programa e de son autoritat de gestion, sas activitats e organizacion. Lo director de la CTP, Jean-Louis Valls, soslinhèt lo besonh d’implicar los joves, que representan « l’avenidor de l’Euròpa », dins la cooperacion.
Se presentèron tanben l’Estrategia pirenenca de la CTP e las accions de l’Observatòri Pirenenc del Cambiament Climatic, e mai lo programa POCTEFA.
Los escambis contunhèron per mai de doas oras e los estudiants poguèron far de demandas e abordar de tematicas coma, per exemple, los empaches engendrats en consequéncia de la crisi sanitària.
