Son ja obèrtas las inscripcions per l’obrador Lo present e l’avenidor de l’Euròpa: la contribucion de la joinessa als territòris transfrontalièrs que organiza la Comunautat de Trabalh dels Pirenèus (CTP) dins lo cadre de la Setmana Europèa de las Vilas e las Regions. L’enregistrament se pòt far aicí. L’obrador, en linha, se debanarà lo 13 d’octobre venent, de 9:30 a 11.
Organizat en collaboracion amb l’Estrategia de l’Union Europèa per la Region Alpina (EUSALP) e la Comission Europèa, aqueste obrador aurà per tòca donar la votz a la populacion jove e escotar sas iniciativas e prepausicions relacionadas amb la cooperacion transfrontalièra. Lo programa complet se pòt descargar aicí.
Lo present e l’avenidor de l’Euròpa: la contribucion de la joinessa als territòris transfrontalièrs aurà la participacion en dirècte de la coordinatritz per la joinessa de l’Union Europèa, Biliana Sirakova; la coordinatritz del Manifèste dels joves pels joves per faiçonar la politica de cooperacion europèa, Astrid Aulnette; una representanta del Conselh de la joinessa de l’EUSALP (EUSALP Youth Council), Eva Dušak; e un representant del Fòrum Transpirenenc de la Joinessa, Joan Jiménez.
En mai d’aquò, es prevista la participacion per messatge video d’autres intervenents que ajudaràn a donar una vision plurala sus las accions relacionadas amb la joinessa e la cooperacion transfrontalièra que se desvolopan ara en Europa.
La Setmana Europèa de las Regions e las Vilas (EU Regions Week) es un esveniment de la Comission Europèa que, per la segonda annada de tira, se debanarà integralament en linha. S’agís del mai grand esveniment comunitàri dedicat a la politica de coesion de l’UE e, dempuèi 18 ans, reunís territòris e entitats europèas. En 2021, la Setmana Europèa de las Regions y las Vilas se celebra jos la devisa “Ensems per la recuperacion”.
