La Comunautat de Tribalh deus Pirenèus qu’a juntat l’aliança entà la ciutadanetat transfrontalèra promovuda per la Mission operativa transfrontalèra (MOT), l’Associacion de regions frontalèras europèas (ARFE) e lo Servici centrau europèu d’iniciativas transfrontalèras (CESCI).
Dens los territòris frontalèrs que viven 150 milions d’abitants qui representan 30 % de la populacion de l’Union Europèa. Cada dia, 2 milions de personas que traucan la frontèra, e que viven atau de purmèra man l’alandada de las frontèras de l’UE. En mei, aqueras regions que’s considèran com laboratòris entà aviar la transicion cap a metòdes navèths de desvolopament economic e ecologic, de participacion ciutadana, de gestion de crisi e de coesion territoriau. La crisi deu Covid-19 que provoquè que’s prenossen mesuras descoordinadas e accions non cooperativas, totun que revelè tanben fòrmas multiplas de cooperacion e solidaritat transfrontalèra.
Com entitat transfrontalèra enter Espanha, França e Andòrra, la Comunautat de Tribalh deus Pirenèus, qui representa territòris dens los quaus 10 % de la populacion frontalèra de l’UE e viu, qu’a volut signar lo document, au quau contribuirà tanben entà enriquí’u. L’objectiu de l’Aliança qu’ei de suplir mei de ressorsas e de poders a las autoritats frontalèras entà contunhar de promòver la cooperacion territoriau e tirar las barrèras invisiblas qui existeishen enqüèra.
Lo tèxte de l’Aliança que serà ubèrt a las contribucions dinc au 15 de seteme. Un còp acabada, que’s presentarà oficiaument au 1èr Fòrum de Frontèras, qui’s tienerà los 9 e 10 de noveme de 2020 a París.
La CTP qu’encoratja d’autas entitats qui tribalhen dens lo territòri transfrontalèr e entad eth tanben a juntar l’Aliança.
Informacion mei :
