La Comunautat de Tribalh deus Pirenèus qu’estó premiada peus sons tribalhs transfrontarèrs hèits de 1983 enlà, mes tanben en peu son ròtle, aqueths mes passats, tà la concepcion de mesuras entà portar remèri a las consequéncias devastadoras de la COVID-19 a la frontèra pirenenca. Que hè pausa que la CTP a tanben aviat l’Estrategia Pirenenca, plan d’accion dens lo quau e s’estableishen las prioritats entau desvolopament deu territòri pirenenc e las accions entà melhorar la vita deus sons abitants de 2018 dinc a 2024.
Lo prèmi « Sail of Papenburg » qu’arreconeish desempuish 2002 las institucions de l’Euròpa sancèra qui realizan accions exemplars dens lo domeni de la cooperacion transfrontarèra. Qu’ei organizat e remetut per l’Associacion de las Regions Frontarèras Europèas (ARFE) qui estó hargada en 1971 entà las purmèras regions transfrontarèras a las honts de la cooperacion transfrontarèra en Euròpa de la Segonda Guèrra Mondiau, en ahortir atau l’integracion ciutadana dab frontèras nacionaus. Uei lo dia, que compta de cap a 100 membres dens l’Union Europèa e los país vesins.
Entà l’actuau Secretària Generau de la CTP, Rosa Amorós « Qu’ei un aunor entà la Comunautat de Tribalh deus Pirenèus d’estar reconeguda peu son tribalh en aquesta annada tan complicada. Dab la nosta dobla condicion de territòri transfrontarèr e de montanha, que defenem un modèle de recuperacion au còr deu quau lo benestar de la ciutadanetat e la valorizacion de las caracteristicas sociaus, culturaus, lingüisticas e economicas deu vesin e vaden ua hont d’ahida mutuau. Sola la cooperacion que’ns permeterà de s’i escàder a sortir de las consequéncias devastadoras d’aquera pandemia globau. L’Estrategia Pirenenca qui avièm dejà que n’ei l’exemple clar dens lo quau la CTP e hè pròva de la teoria en hicar-la en practica. »
Lo prèmi qu’aunora programas, estrategias, projèctes e accions de compte har dens lo domeni de la cooperacion transfrontarèra qui pòden estar considerat com exemplars. En medish temps, que desira motivar las regions frontarèras e transfrontarèras a contribuir de com cau a ua mei bona compreneson e a mei bonas relacions a las frontèras enter las nacions de l’Euròpa sancèra.
La devisa deu prèmi entà l’annada 2020 qu’èra : Covid-19 – tornar obrir las frontèras. Mesuras e solucions conjuntas dens las regions frontarèras.
