Los representants deus sèt territòris qui compausan lo consòrci de la Comunautat de Tribalh deus Pirenèus (CTP) que’s son amassats uei au Centre ArantzazuLab (Oñati) dens l’encastre deu 40au Conselh Plenèr de la CTP, organizat peu Governament de País Basco. Despuish un an, lo governament basco qu’assegura la presidéncia viradissa de la CTP . Lo son mandat que serà mantienut entà ua annada suplementària .
Lo Lehendakari e actuau president de la CTP, Íñigo Urkullu Rentería, acompanhat deus representants deus autes territòris deu consòrci transfrontalèr, qu’an signat la Declaracion conjunta deus presidents e presidentas, reafirmant lo lor engatjament de cap a la Comunautat de Tribalh deus Pirenèus.
Íñigo Urkullu Rentería, Lehendakari e actuau president de la CTP, qu’a comentat : “En aquera annada de presidéncia de la Comunautat de Tribalh deus Pirenèus, qu’avem tribalhat en collaboracion dab los autes territòris dens maines taus com l’idrogèn, la santat e la joenessa. Qu’avem egaument lançat e gerit l’aperet a micro-projèctes. Melhorar la vita deus ciutadans e la har mei facila qu’ei lo noste objectiu dens la CTP .” Qu’a egaument soslinhat lo ròtle de la Comunautat de Tribalh deus Pirenèus au nivèu europèu : “ Dab la presentacion de l’estrategia pirenenca, la CTP qu’a dejà mostrat que’s podèva estar ua referéncia entau desvolopament e la cohesion territoriau en Euròpa. Ne devem pas pèrder de vista l’urgéncia climatica qui’ns torna tots vulnerables.” Tà çò deu programa de cooperacion transfrontalèra POCTEFA, dont la CTP ei l’autoritat de gestion, qu’a soslinhat com granas estapas l’aprobacion deu programa POCTEFA 2021-2027 per la Comission europèa lo 23 de noveme e la tienuda de l’eveniment de presentacion deus resultats deu POCTEFA 2014-2020 los 4 e 5 d’octobre a Bilbao.
Deu son costat, Meritxell Serret, Ministra regionau de l’Accion exteriora e Union Europèa, Generalitat de Catalonha, qu’a soslinhat qu’espèra e que desira mantiéner los desfís de la CTP e los objectius de l’Estrategia Pirenenca. « Qu’entamenam ua presidéncia mercada per la continuitat de las consequéncias de la pandemia mes tanben per las leçons qui aquera situacion ns’a ensenhadas e a las quaus contunham a afrontar. »
Alain Rousset, President deu Conselh Regionau de Novèla Aquitània qu’a soslinhat que « la barradura de las frontèras n’ei pas la solucion a qué que sia ». Qu’a concludit per un messatge clar sus l’importància de las zònas transfrontalèras : « Qu’avem enqüèra hèra a har, mes com europèus convençuts, qu’afirmam qu’Euròpa qui volem déver se bastir a partir de las nostas frontèras, de las nostas zònas de vita transfrontalèras e de las nostas carrèras. »
Maria Ubach Font, Presidenta de l’Agéncia andorrana entà la cooperacion transfrontalèra, Ministra deus Ahars estrangèrs deu Governament d’Andòrra, qu’a explicat que « la pandemia qu’a mostrat quant ei important de cooperar enter los territòris e de trobar solucions collectivas pr’amor que partatjam problèmas. Lo programa navèth POCTEFA 2021-2027 que serà lo tresau a lo quau Andòrra participa e qu’avem vist l’importància estrategica de s’implicar e de s’apressar de l’Union Europèa. Dens aqueth periòde navèth, qu’acordam ua atencion particulara a l’objectiu d’ua Euròpa mei sociau entaus ciutadans ».
Yann Hélary, Conselhèr deu Conselh Regionau d’Occitània, qu’a soslinhat que « Qu’avem un interès gran entà la cooperacion transfrontalèra en Occitània ». Lo ministre qu’a egaument adreçat un mot d’encoratjament a la presidéncia navèra : « Qu’encoratgi viste la presidéncia navèra a perseguir lo tribalh dificile e a se prémer la dinamica qui ei estada lançada. Que’u desiram hèra escaduda dens lo son mandat navèth . »
Ana Ollo Hualde, conselhèra de las Relacions Ciutadanas deu Governament de Navarra que s’ei egaument virada cap tà l’aviéner entà anonciar que « la barradura de las frontèras en 2020 qu’a tirat lo senhal d’alarma sus la fragilitat de la cooperacion transfrontalèra e que, entà Navarra e la CTP, qu’ei important que los passatges frontalèrs sian obèrts pr’amor qu’aquò qu’entraine sofriments entaus ciutadans europèus ». Qu’a egaument qu’ajusta que « qu’èm plan urós qui l’aperet a microprojets anonciat aja vienut a la lutz ».
En aqueth esgard, pendent lo Conselh Plenèr, lo director de la CTP, Jean-Louis Valls, qu’a anonciat que lo prumèr aperet a projèctes POCTEFA 2021-2027 que serà lançat au prumèr trimèstre 2023. Qu’a egaument dreçat un brèu bilanç de la gestion deu POCTEFA 2014-2020 au cors de lo quau 175 projèctes de cooperacion transfrontalèra son estats programats.
En mei, dus joens deu territòri pirenenc qu’an presentat lo bilanç deu dusau Fòrum Transpirenenc de la Joenessa qui s’ei tienut fin octobre e au començar de noveme de 2022 a Hondarribia e qui a entà ambicion de vàder un encontre transfrontalèr annau de la joenessa pirenenca.
Ua session entitolada « Idrogèn verd : un projècte entà un HUB deus Pirenèus » qu’a egaument avut lòc . Aquesta que comprenè intervencions e ua taula redona dab expèrts dens aqueth maine. actors internacionaus deu maine de l’idrogèn com vector energetic qu’an participat ad aqueth debat e qu’an partatjat las lors impressions sus l’aviéner d’aqueth sector en Euròpa, mes sustot dens los Pirenèus. Los participants qu’èran dauna A . Tomczak, membre deu gabinet deu vicepresident de la CE, Frank Timmermans, comissari au Pacte verd europèu e a l’accion entau climat ; Stephen Jackson, Chief Tech & Market Officer de Hydrogen Euròpa ; Iñigo Ansola, director generau de l’Agéncia de l’Energia de País Basco (EVE) – Vicepresident deu Correder basco de l’idrogèn ; Valérie Demangel, directora Euròpa e Internacionau, Comunautat d’aglomeracion Pau Bearn Pirenèus, Pirenèus Hidrogène ; Henar Rabadán, Hydrogen Business Intelligéncia de Repsol, com representanta de l’Aliança Shyne e deu Correder Idrogèn de l’Ebre ; Meritxell Cuyàs, tecniciana deu burèu de l’Energia i del Canvi Climàtic, Ministèri de l’Environament, de l’agricultura e deu Desvolopament Duradís, Governament d’Andòrra e Nicolas Schaeffer, Agéncia Regionau de Desvolopament Economic, AD’OCC, Region Occitània.
