Deus delegats de 97 país de montanha que’s son amassats a Aspen, aus Estats Units, entà reafirmar lo lor engatjament de cap a l’Associacion de la montanha, qui a tienut la soa sheisau reünion mondiau a la fin deu mes de seteme.

L’Associacion de la montanha qu’ei ua aliança volontària de las Nacions Unidas consacrada a las populacions e aus environaments de montanha, dont l’Organizacion de las Nacions Unidas entà l’alimentacion e l’agricultura (FAO) qu’assegura lo secretariat .

Lo document finau d’aquera reünion, la declaracion d’Aspen, qu’encoratja la cooperacion enter los país de montanha sus un large ventalh de questions, sustot l’economia, lo desvolopament sociau, l’environament, la cultura, la sciéncia e l’educacion, atau com la realizacion deus objectius de desvolopament duradís.

« L’adopcion de la Declaracion d’Aspen que balha aus membres de l’Associacion de la montanha ua aviada navèra entà plaçar la durabilitat e la resiliéncia deus ecosistèmas e de las comunautats de montanha au còr deus procediments, de las politicas e deus investiments internacionaus dens l’encastre deu Programa 2030 entau desvolopament duradís », qu’a declarat Rosalaura Romeo, deu Secretariat de l’Associacion de la montanha.

La delegacion andorrana a l’eveniment, dirigida per la ministra de l’environament, de l’agricultura e deu desvolopament duradís, Sílvia Calvó, qu’a argumentat pendent lo grop de tribalh informau qui la declaracion d’Aspen deuré includir ua mencion especifica deus Pirenèus, com ei dejà lo cas entaus Aups, l’Imalaia e autas cadenas de montanhas. En mei, los organismes, convencions e platafòrmas regionaus especificas, taus com la Comunautat de tribalh deus Pirenèus, que son egaument estat pres en compte .

La Declaracion d’Aspen qu’ei disponibla ací (en anglés).

Los desfís de las regions de montanha

Segon las darrèras chifras, environ 1,1 miliard de personas que viven en montanha . Totun, la pèrta de biodiversitat, lo cambiament climatic, la degradacion deus sòus e la pollucion qu’afèctan de mei en mei e grèument los ecosistèmas de montanha e la vita dens las montanhas.

L’Associacion de la montanha qu’ei estada fondada en 2002 entà relhevar los desfís a los quaus son confrontadas las regions de montanha en se prement las ressorsas, las coneishenças, las informacions e l’experiéncia ricas e variadas de las soas mei de 460 membres.

Mei d’informacions: