Saint-Jean-Pied-de-Port, vila basca de grana tradicion transfrontalèra, qu’arcuelh uei mei de 30 organismes de totas los Pirenèus entà tribalhar sus las lors idèas de projèctes qui a per mira de revitalizar la tecnica de construccion de pèira seca dens los Pirenèus. L’estiu darrèr, la Comunautat de Tribalh deus Pirenèus (CTP) qu’a lançat un aperet a idèas de projèctes sus aqueth tèma dab la mira de bastir projèctes de cooperacion transfrontalèra. Ua dotzena d’organizacions e d’enterpresas deus territòris pirenencs qu’an responut per las lors proposicions, qui seràn discutidas uei au sèti de la Comunautat d’Aglomeracion de País Basco.

L’idèa de lançar un projècte sus la pèira seca qu’ei neishuda de la volontat de revalorizar lo patrimòni deus Pirenèus, largament mesconegut, non solament per la recuperacion deus elements fisics mes tanben de la tecnica de construccion e deus sons usatges ancestraus, reconeguts com patrimòni immateriau de l’UNESCO en 2018.

Un art qui pòt contribuar a l’insercion professionau, a la promocion d’un torisme mei duradís, a l’aplicacion de çò qui s’apèra las « solucions fondadas sus la natura » aus riscs naturaus o enqüèra a la proteccion de la biodiversitat, pr’amor que los elements bastits dab l’ajuda d’aquera tecnica jògan un ròtle important dens l’agro-pastoralisme e com abitat entà las plantas, los liquèns, los insèctes, los reptiles e los mamifèrs petits.

L’objectiu de la Comunautat de Tribalh deus Pirenèus dab aquera jornada qu’ei de bastir projèctes de cooperacion transfrontalèra qui favorizan l’identificacion deus abitants deus Pirenèus dab lo lor patrimòni culturau.

Un grop de tribalh dedicat au patrimòni culturau deus Pirenèus

En 2019, la Comunautat de Tribalh deus Pirenèus qu’a lançat un grop de tribalh dedicat au desvolopament e a la revitalizacion deu patrimòni culturau pirenenc. Aqueth grop qu’ei compausat d’expèrts de cadun deus sèt territòris de la CTP, designats peus lors governaments respectius.

Lo patrimòni culturau qu’ei l’un deus pielars deu dusau èish tematic de l’estrategia pirenenca. Aquera estrategia qu’a per mira de desvolopar accions entà melhorar l’atractivitat deu territòri, atau com a identificar navèths jaç d’emplecs, deus mestièrs d’aviéner o la creacion d’un hialat transfrontalèr d’auhèrtas d’emplecs désaisonnalisées. D’un aute costat, que mira egaument a ahortir la cooperacion transfrontalèra per la creativitat e l’innovacion sociau per e entau territòri.

La pèira seca qu’ei apareishuda com un subjècte d’interès comun dens lo grop de tribalh. La construccion de pèira seca que hè partida deu patrimòni culturau pirenenc e europèu. Dens los Pirenèus, mes tanben dens de nombrosas autas regions d’Euròpa, que’s tròba milèrs de quilomètres de parets bastidas dab aquera tecnica ancestrau, atau com bastiments aus usatges plan variats.