La Comunautat de Trabalh dels Pirenèus a presentat una candidatura de projècte al programa europèu Erasmus+ per començar lo primièr Fòrum Transpirenenc Juvenil. La tòca d’aquela candidatura, nomenada Pyrenean Youth, es que los joves pirenencs se pòscan metre en contacte e discutir a prepaus de lors besonhs amb l’intencion de los far arribar a aqueles que prenon las decisions.
Aquela iniciativa es sortida del Grop de Trabalh de Joventut de la CTP que se constituïguèt en 2019 dins l’encastre de l’Estrategia Pirenenca. Sos integrants an a l’encòp l’experiéncia e lor saber far tocant a la gestion dels programas regionals de joventut e representan los sèt territòris de la CTP (Nòva-Aquitània, Region Occitània, Euskadi, Navarra, Aragon, Catalonha e Andòrra) per trabalhar ensems e lançar d’iniciativas de cooperacion transfrontalièra, coma aquela.
Pyrenean Youth cèrca d’organizar de fòrums transpirenencs juvenils en 2021 e 2022 e de trabalhar per que se constituïsca lo primièr Conselh Juvenil Transpirenenc coordinat, de son latz, amb los Conselhs Regionals de la Joventut. Amb aquela candidatura, la CTP comença la primièra accion en joventut, un dels encastres dins los quals la CTP a decidit centrar sos esfòrces dempuèi que foguèt adoptada l’Estrategia Pirenenca en 2018.
Es previst que las activitats dels fòrums transpirenencs juvenils seràn presentadas per un grop de joves pendent lo Conselh Plenari de 2020.
