Las solucions basadas sus la natura deu projècte PHUSICOS qu’an dejà provat la lor eficacitat dens los Pirenèus : despuish 2019, los cas que pilòtas de Santa Elena e d’Artouste que sèrven de laboratòri a ua practica qui permeterà de previéner las cadudas de blòcs sus la rota religant Espanha e França peu Portalet. Gràcias a las solucions aplicadas, basadas sus la construccion de terrassas e l’utilizacion d’elements naturaus de husta e de pèira, los riscs que son evitats en minimizant l’impacte suu paisatge e l’environament.
Los 11 e 12 d’abriu a Laruns (Pirenèus Atlantics), los resultats de quate annadas de tribalh dens los Pirenèus que son estats presentats pendent un seminari organizat per l’Observatòri Pirenenc deu Cambiament Climatic de la Comunautat de Tribalh deus Pirenèus, en collaboracion dab la vila de Laruntz (França) e l’Associacion espanhòla d’engenheria deu paisatge, membre de la Federacion europèa de bio-engenheria deu paisatge.
Lo seminari qu’a comprés un cors de formacion suus riscs naturaus dens los Pirenèus, las tecnicas de bio-engenheria, deus exemples de construccions e un talhèr practic sus las maquetas, atau com ua visita de las òbras realizadas dens l’encastre deu projècte PHUSICOS.
