Lo projècte de la Comission europèa e de l’OCDE qui a per mira de melhorar lo governament multi-nivèus dens las zònas transfrontalèras qu’ei estat lançat lo 25 de genèr . La Comunautat de Tribalh deus Pirenèus qu’ei l’ua de las cinc accions pilòtas a desvolopar, sustot dens lo maine de la santat.
Los territòris transfrontalèrs que representan 40% deu territòri de l’Union Europèa, 30% de la soa populacion e 30% deu son produit interior brut. Qu’arcuelhen egaument haut o baish 2 milions de tribalhaires transfrontalèrs .
Aqueth projècte que durarà 15 mes, dinc en mai de 2024, e que consistirà en ua analisi deu territòri, lo desvolopament d’ua atruna d’analisi, deus escambis enter las cinc accions pilòtas e un rapòrt finau.
La santat au còr deu projècte
Lo tèma prepausat per la CTP entad aqueth projècte qu’ei la santat, e que s’agirà de melhorar lo governament de la zòna foncionau de Cerdanya e deu pòle de santat a l’entorn de l’espitau transfrontalèr, com epicentre deus pòles geriatric, pediatric e deu futur pòle psiquiatric.
En junh de 2023, ua equipa d’expèrts de l’OCDE (especialistas de la demografia, de las infrastructuras e deus investiments) e deus representants de la Comission europèa qu’anaràn dens los Pirenèus entà encontrar professionaus de la santat, deus pacients, deus elegits locaus, deus representants deu conselh d’administracion deu GECT Espitau Transfrontalèr de Cerdanha (HTC), de l’Universitat de Perpinhan e de las enterpresas deu sector de la santat.
