Dins lo quadre del OPCC ADAPYR e LIFE AT-CC Pirineos, dos projèctes menats per l’Observatòri Pirenenc del Cambiament Climatic (OPCC), comença un procès de participacion que servirà per completar e validar la futura Estrategia Pirenenca del Cambiament Climatic (EPCC). Aqueste es lo document que l’OPCC i trabalha dempuèi 2020 e que servirà per armonizar las politicas de cambiament climatic pertot dins lo massís dels Pirenèus.
L’estrategia serà la primièra de son genre, amb un apròchi global, dins l’Euròpa: fins ara existisson pas cap d’autras estrategias d’adaptacion al cambiament climatic a caractèr transfrontalièr que abòrden los desfisses climatics de la bioregion de manièra transvèrsala. Amb un bèl sosten politic e en linha amb l’aprobacion recenta de l’Estrategia d’Adaptacion al Cambiament Climatic de L’Union Europèa, l’EPCC trabalharà per melhorar l’adaptacion dels territòris dels Pirenèus als efèctes del cambiament climatic, en prene en compte los agents pirenencs.
Pendent lo procès participatiu, se debanaràn divèrses talhèrs tematics transpirenencs, que abordaràn de questions coma lo clima, los espacis naturals, los sistèmas socioeconomics e l’economia de montanha, aital coma la populacion, lo territòri e la governança. Inevitablament tanben se prendràn en compte los besonhs e la particularitats dels sèt territòris que intègran la Comunautat de Trabalh dels Pirenèus.
Es previst que siá publicat un document complet sus l’Estrategia Pirenenca del Cambiament Climatic a la debuta de la tardor de 2021. Lo desvolopament de son Plan d’implementacion s’abordarà dins las etapas seguentas.
Mai d’informacions:
