S’anoncièt l’incorporacion del Principat d’Andòrra al consòrci (mai d’informacions aicí) concretada amb las signaturas de la Convencion Interadministrativa d’Adesion de l’Organisme Andorran de Cooperacion Transfrontalièra al Consòrci de la Comunitat de Trabalh dels Pirenèus e la modificacion dels Estatuts del Consòrci.


La CTP a realizat una avaloracion "positiva" de la siá contribucion al procès d’integracion transfrontalièra dempuèi qu’en 1982, fa 30 ans, s’adoptèt la declaracion de la Conferéncia de las Regions Pirenencas qu’origina a l’organisme. “Dins la memòria demòra lo remembre d’aqueles tempses passats que la frontièra èra emplegada coma barrièra per l’alunhament e per marcar de diferéncias entre los qu’abitam als dos penents de la montanha”, çò ditz la declaracion comuna adoptada pels presidents e representants dels territòris de la CTP. Un tèxt que la CTP reïtèra lo sieu engatjament a gerir de fonzes del Programa Operatiu de Cooperacion Territoriala Espanha-França-Andòrra (POCTEFA) 2014-2020, pr’amor que l’an que ven conclutz la designacion per projèctes del periòde 2007-2013.
Las autoritats de las uèch regions an explicat en una conferéncia de premsa lo contengut d’aquela declaracion. Sus aquel tèma, la Presidenta de Navarra soslinhèt la volontat de la CTP de manténer aquel “espaci de collaboracion”. “Collaborar es mai necessari que jamai en aqueles moments de crisi”, çò apondèt Yolanda Barcina. Del sieu costat, Luisa Fernanda Rudi, presidenta d’Aragon, indiquèt que mercés al prètzfach de la CTP los Pirenèus son una barrièra mai petita que fa 30 ans. “E 30 ans après, aquela barrièra serà mai permeabla qu’ara”, çò diguèt.
La declaracion comuna compta uèch ponches. Dins los dos primièrs se destaca lo prètzfach desvolopat per la CTP e dins lo tresen s’anóncia l’integracion del Principat d’Andòrra dins lo consòrci de la CTP.

Desvolopament, fonzes europèus, transpòrts e adaptacion al cambiament climatic
Dins lo ponch quatren de la declaracion, la CTP reafirma la siá volontat d’èsser un “autentic espaci interregional europèu que simbolize la solidaritat entre territòris” e soslinha qu’es un “esplech capable e necite per adaptar las orientacions estrategicas de l’UE davant los enjòcs regionals e per consequéncia aumentar l’eficacitat de las politicas economicas, socialas e environamentalas per mejan d’estrategias conjonchas en favor del desvolopament durable”.
En cinquen luòc, la CTP mòstra lo sieu sosten a la decision de la Comission Europèa de manténer lo sieu engatjament amb la politica regionala, e demanda que siá passa passada a un segond plan la realitat territoriala de la CTP e los besonhs de las zònas. Tanben demanda un màger protagonisme dins la politica de coesion comunitària.
Dins lo sièisen ponch, la CTP anóncia que presentarà la siá candidatura per èsser autoritat de gestion del venent Programa Operatiu de Cooperacion Territoriala Espanha-França-Andòrra (POCTEFA 2014-2020).
Fin finala, dins los ponches setens e ochens, la CTP defensa, davant l’actuala crisi economica e financièra, lo besonh de pariar pels rets transeuropèus de transpòrts, telecomunicacions e energias eficientas perque vengan “veritablas espinas dorsalas del territòri” e contribuiscan a “consolidar lo mercat unic europèu”. Se reafirma lo besonh d’implantar d’estrategias comunas perque las economias s’adapten als enjòcs del cambiament climatic.
Legissètz la Declaracion comuna aicí.

Dobla session
Lo conselh plenari comencèt dimècres lo 14 de novembre amb una recepcion que la Presidenta de Navarra e de la CTP, Yolanda Barcina, ofriguèt dins lo Musèu Jorge Oteiza (web) d’Alzuza als assistents. Los participants visitèron lo Musèu qu’acuelh la colleccion personala del conegut escultor e artista integral (Orio,1908-Sant Sebastian, 2003).
La jornada de dijòus se desvolopèt en doas sessions parallelas, las doas dins la Ciutat de la Musica de Navarra. D’un costat, se debanèt la reünion annala dels presidents, ont son anadas las autoritats que representan los uèch territòris que conforman la CTP. Del costat espanhòl, i anèron las presidentas de Navarra e d’Aragon, Yolanda Barcina e Luisa Fernanda Rudi, respectivament; lo secretari de Govèrn de la Generalitat de Catalonha, Germà Gordó; e lo secretari general d’Accion Exteriora del Bascoat, Guillermo Echenique. Del costat francés, i aviá lo vicepresident del Conselh Regional d’Aquitània, François Maïtia; lo conselhièr regional de Lengadòc-Rosselhon, Marcel Mateu; e lo vicepresident del Conselh Regional de Miègjorn-Pirenèus, Marc Carballido. E, de la part d’Andòrra, i participèt lo ministre d’Afars exteriors e president de l’Organisme Andorran de Cooperacion Transfrontalièra, Gilbert Saboya Sunyé.
La cooperacion deven musica
D’un autre costat, se debanèt, dins la sala de l’Orquèstra, una session de trabalh que las comissions e los grops de trabalh qu’intègran la CTP faguèron balanç dels 30 ans d’existéncia de l’organisme e redigiguèron una fuèlha de rota a cort e mièg tèrme ont i an exprimit los objectius e las accions per los aténher. La session, nomenada “Orquestrar la cooperacion”, amassèt près de 75 personas de las comissions d’Infrastructuras e Comunicacions, e Formacion e Desvolopament Tecnologic; e dels grops de trabalh de Cultura; Espòrt e Joventut; Environament; Amenatjement del Territòri; l’Observatòri pirenenc del cambiament climatic.
La jornada finalizèt amb un acte de clavadura ont i participèron totes los assistents al conselh plenari, e amb l’accion del grop transfrontalièr Aulodia Oboe Ensemble, qu’es format per d’escolans dels conservatòris de Pamplona, de Baiona (Aquitània) e d’Irun (Guipuscoa), jos la direccion de Juan Mari Ruiz e Jacky Morel.

_________________
30 ans d’istòria
A l’intrada de la Ciutat de la Musica s’i installèt una petita exposicion que, amb motiu dels 30 ans d’existéncia de la Comunitat de Trabalh dels Pirenèus, visa sintetizar l’origina e las valors de l’organizacion transfrontalièra.

Cal remembrar que la CTP sorgiguèt en 1983 per balhar a l’airal pirenenc una estructura de cooperacion transfrontalièra similara a las existentas en d’autras frontièras europèas. La siá tòca principala es contribuir al desvolopament del massís pirenenc en prenent en compte los sieus enjòcs e en preservant las siás riquesas, e en fomentant la cooperacion transnacionala.

La Comunitat de Trabalh dels Pirenèus fa 30 ans que fomenta la cooperacion per far venir la frontièra un luòc d’amassada e d’escambi amb doas tòcas : lo desvolopament armoniós e durable de tot l’airal de frontièra – e lo melhorament de las condicions de vida dels abitants.