De nombroses projèctes portats transfrontalièrs son estats presentats, dont divèrses projèctes POCTEFA (Transversalis, Euroinstitut catalan, Transfermuga, l’Espital transfrontalièr de Puigcerdà). D’autres projèctes de collaboracion menats a tèrme dins l’Euroregion Pirenèus-Mediterranèa coma per exemple Mercuri, desvolopat dins lo marc del programa Erasmus for Young Entrepreneurs o encara CREAMED dins l’encastre del programa SUDOE, an egalament permés de mostrar lo dinamisme e la volontat de collaboracion sus aquel territòri.

Ça que la, los intervenents an mostrat una granda preocupacion per çò qu’es de la comunicacion e de la valorizacion de l’accion de l’Union europèa a travèrs d’aqueles projèctes. En efièch, se los beneficis de la collaboracion e de l’accion de l’Union europèa pausan pas cap de dobte pels que trabalhan a l’entorn d’aquelas questions, la problematica de l’informacion al grand public es largament estada levada. En vesent la crisi que travèrsa l’UE e en vesent la pujada de l’eurosceptisme, la manca de coneissença del grand public sus l’accion concrèta de l’UE suls territòris preocupa. Aquela question a egalament levat la necessitat d’implicar mai las institucions e los ciutadans, de favorir la participacion als projèctes. Aquò es çò que balha de vida e de sens a aquela accion europèa. Per aquò, la volontat politica e tanben lo ròtle dels rets semblan indispensables. Aital coma la mesa en marcha d’una comunicacion mai prèpa del territòri. Qualques preocupacions que son particularament mesas abans l’an 2013, Annada europèa dels Ciutadans, remembrem-o.

Fin finala, l’amassada de Barcelona a permés d’assistir a una presentacion, per Marc Lobet de la Direccion generala de la politica regionala (Comission europèa), dels futurs de la politica regionala sustot en matèria de collaboracion transfrontalièra. E Cristina Arcaya, secretària generala de la CTP, a presentat la Comunitat de Trabalh dels Pirenèus coma estructura engatjada en la collaboracion sus la frontièra Espanha-França-Andòrra dempuèi mai de trenta ans e autoritat de gestion del programa de collaboracion POCTEFA (2007-2013). A remembrat lo ròtle e l’engatjament de la CTP per aumentar l’eficacitat de las politicas economicas, socialas e environamentalas transfrontalièras a travèrs de la mesa en marcha d’estrategias comunas en favor del desvolopament durable del territòri aital coma la volontat de participacion de la CTP al bastiment d’Euròpa 2020 coma o mòstra sustot la siá decision de presentar sa candidatura per èsser autoritat de gestion del futur programa de collaboracion territoriala Espanha-França-Andòrra (2014-2020).

Mai d’informacions e totes los documents se pòdon descargar aicí.