Aital, lo prèmi joenessa de la CTP, dotat de 10 000€, es estat autrejat al Licèu d’ensenhament general e tecnologic agricòla Federico Garcia Lorca de Tesà (Pirenèus orientals) e al licèu Axular de Sant Sebastian (Euskadi) pel sieu «Du pays roussillonnais au pays basque: nos élèves sur les chemins du développement durable». Aquel projècte d’educacion al desvolopament durable met l’accent sus dos tematicas environalas: la gestion de l’aiga e la gestion de la biodiversitat.

Lo projècte s’organiza en divèrsas partidas. Se pausa sus l’organizacion de viatges d’estudi que devon permetre als escolans de descobrir e comprene un autre territòri que lo sieu en particular suls enjòcs ligats al desvolopament durable dels territòris, sus las dimensions istoricas e culturalas dels territòris e sus la mesa en òbra de l’Agenda 21 dins l’establiment partenari. Un film consagrat a la cooperacion serà realizat pendent lo projècte. Las imatges seràn realizadas pels escolans amb lo material del que dispausan los establiments.

Fin finala, dins l’encastre d’aquel projècte, una plataforma collaborativa multimèdia consagrada a la question del desvolopament durable serà desvolopada. La tòca es de dobrir l’accès a aqueles recorses a d’autres establiments escolars del territòri de la CTP, en lor incitant aital a rejontar l’accion.

Per çò qu’es del Tribut de las Tres Vacas, a recebut lo Prèmi «Forças vivas» de la Comunitat de Trabalh dels Pirenèus, en reconeissent aital lo papièr istoric d’aquel pacte transfrontalièr e la siá valor coma patrimòni cultural immaterial. Lo Tribut de las tres vacas (1375) pòt èsser considerat coma lo tractat en vigor lo mai ancian d’Euròpa.

Lo tribut de las tres vacas crèa de ligams talament fòrts entre las municipalitats del Roncal e de Varetons que las relacions van fòrça mai luènh de la ceremònia del Tribut de las 3 vacas. Amb lors pròpris mejans, an bastit, fa 50 ans, una rota transfrontalièra que jonh las 2 valadas e uèi menan, amassa, de projèctes toristics e educatius sul tèma de la nèu.

Segon Ángel Luis de Miguel, cònsol d’Isaba (Val del Roncal-Navarra) aquela reconeissença los ajudarà a far que l’UNESCO declare lo Tribut de las Tres vacas «Patrimòni de l’umanitat». A egalament exprimit lo desir que la CTP, en tant qu’organisme transfrontalièr, organize, cada an, una jornada de trabalh sul territòri del tractat aital coma son intencion de crear un prèmi per la patz en sabent que lo Tribut de las Tres vacas es la fèsta de la patz la mai anciana d’Euròpa.

Per veire l’entrevista dels premiats, clicatz aicí.