Lo 28 de mai de 2013 passat l’Observatòri Pirenenc del Cambiament Climatic (OPCC) presentèt a Tolosa l’Estudi sus l’adaptacion al cambiament climatic als Pirenèus. Aquel estudi coincidís amb la publicacion recenta de l’Estrategia Europèa d’adaptacion al cambiament climatic de la part de la Comission Europèa, e ofrís un nòu vejaire sus aquel tèma en metre l’enfasi sus l’adaptacion de la societat al nòu contèxt climatic. L’estudi es estat encargat per la region Miègjorn-Pirenèus dins l’encastre del projècte POCTEFA OPCC, e comptèt amb la collaboracion amb la Comunitat de Trabalh dels Pirenèus (CTP).

Lo seminari de presentacion de l’estudi comptèt amb la preséncia Jean-Louis Etienne, President del Conselh Scientific de l’OPCC. Segon Jean-Louis Etienne lo calfament global es vengut una “malautiá cronica de la Tèrra” qu’a de besonh de mesuras a long tèrme”. E segon lo mètge e explorator francés los Pirenèus, gràcias a l’OPCC, comptan amb un avantatge per rapòrt a d’autras zònas de montanha en dispausar d’un utís de cooperacion interregional e transfrontalièr que li permet d’abordar aquela question d’un biais integral, en contribuissent a redusir los impactes advèrses del cambiament climatic e en aumentant la visibilitat dels Pirenèus a nivèl internacional.

Per mai d’informacions sus aquel tèma e per descargar las presentacions del seminari, consultatz lo sit web de l’OPCC.

Rendètz-vos venent: lo 6 de novembre 2013 l’OPCC organiza a Pamplona lo Collòqui Internacional sus cambiament climatic en zònas de montanha. Lèu trobaretz totas las informacions sul sit de l’OPCC.


Jean-Louis Etienne. Fòto: OPCC                                                                                 Seminari. Toulouse. Fòto: OPCC