Lo darrièr 6 de novembre l’Observatòri Pirenenc del Cambiament Climatic (OPCC) organizèt dins lo Planetari de Pampaluna un Collòqui Internacional sul Cambiament Climatic dins de zònas de montanha. Jol lèma “Observar per s’adaptar”, aquel colòqui acampèt a la capital navarresa especialistas internacionals sul cambiament climatic per analizar los cambiaments que caldrà aver dins las zònas de montanha dins l’avenidor, e debatre subre las melhoras estrategias d’adaptacion per aquel nòu contèxt.

A l’eveniment, s’i acampèron mai de 150 personas, entre d’especialistas, d’autoritats regionalas, nacionalas e europèas, d’agents socials e economics… Un succés de participacion que demòstra l’interés que desperta aquel subjècte dins la ciutadanetat.

Dins la vesprada, l’OPCC presentèt los resultats d’aquel projècte pendent mai de tres annadas d’existéncia, en subjèctes coma l’aiga, los bòsques, los risques naturals, la biodiversitat o los espleches de teledeteccion.

La CTP s’engatja per l’avenidor de l’OPCC

L’OPCC es una iniciativa innovanta al nivèl europèu per l’estudi del cambiament climatic dins las zònas de montanha. Es estat començat per la Comunitat de Trabalh dels Pirenèus (CTP) e a comptat amb lo sostén economic del Programa Operatiu de Cooperacion Territoriala Espanha-França-Andòrra 2007-2013 (POCTEFA). Dins d’aquel seminari, la CTP comuniquèt la volontat de contunhar amb los trabalhs de l’Observatòri pirenenc del Cambiament climatic. S’afortiguèt lo besonh d’observar aquel cambiament climatic al nivèl de tot lo massís e de continhuar afortint un OPCC que trabalha per ajudar la presa de decision politica. Lo cambiament climatic serà dins l’avenidor una linha d’actuacion estrategica per la CTP per son caracter transversal, per las consequéncias qu’a sul territòri e dins las activitats umanas.