Los prèmis son estats liurats per dos membres del jurat encargat d’avalorar las òbras presentadas al concors. En primièr luòc, Javier Manzanos, director del Centre d’Art Contemporanèu Huarte a fach liurament del diplòma a Amaia Gracia, guanhadora del Grand Prèmi del concors, dotat amb 3.000€. Gracia es una jove artista plastica sòcia del centre de produccion artistica Bilbaoarte, e son trabalh s’es centrat suls Pirenèus dins las darrièras annadas.
De contunh, lo membre andorran del jurat, Alfons Valdés, arquitècte e pintor, a fach una alocucion ont a mencionat “qu’Andòrra agís coma pont cultural entre los sieus dos vesins”. A participat prèviament a pintar una ficha de dominò amb un dels sieus dessenhs per que siá plaçada entre las autras que tombaràn pendent la jornada del 21. Lo guanhador del segond prèmi (dotat amb 1.000€), Alexandre Montourcy, a pas pogut anar a la ceremònia per d’engatjaments de trabalh, mas a mandat un messatge que soslinhava lo prètzfach de la CTP e lo POCTEFA a la transformacion d’un obstacle coma la frontièra en una font d’amassada e escambi, en influint sul trabalh dels artistas que i vivon près.
Las òbras dels dos guanhadors se son pogudas contemplar pels assistents al liurament e se tròban ja expausadas al Centre Huarte d’art contemporanèu fins al 30 de novembre.