En mai de la gestion jornalièra dels projèctes en marcha, podèm soslinhar que la CTP s’es centrada al dessenh del POCTEFA 2014-2020 e en son trabalh coma Cap de Fila de l’OPCC, que faguèt a la fin de l’annada lo balanç de son activitat dins lo primièr collòqui internacional sus cambiament climatic dins las zònas de montanha.

La CTP trabalha dempuèi fa qualques meses a la redaccion e elaboracion del POCTEFA 2014-2020. Dins aquel sens, lo Comitat de Seguiment del POCTEFA validèt en octòbre lo Diagnostic Territorial Estrategic, primièr pas per l’elaboracion del programa. Aquel diagnostic de la zòna transfrontalièra França-Espanha-Andòrra a la tòca de determinar las fortalesas e las feblesas del territòri per preparar lo futur periòde de programacion. Lo diagnostic foguèt somés a una Avaloracion ExAnte que constatèt sa qualitat e validitat.

En 2013 POCTEFA a desvolopat una docuweb per melhorar la visibilitat del POCTEFA e sensibilizar los beneficiaris eventuals fàcia a la preparacion del futur programa 2014-2020.

La clausura lo passat 10 de decembre de la 3a convocacion de POCTEFA 2007-2013 supausèt la fasa finala per la presentacion de projèctes de cooperacion transfrontalièra. Dins las convocacions precedentas se recebèt un total de 244 projèctes que fin finala 133 ne foguèron programats entre 2007 e 2011.

L’Observatòri Pirenenc de Cambiament Climatic (OPCC), projècte gerit per la CTP, organizèt lo 6 de novembre a Pampalona lo primièr collòqui internacional sus cambiament climatic dins zònas de montanha qu’assistiguèron mai de 150 participants e ont se partegèt d’exemples de bonas practicas desvolopadas dins cada territòri. L’OPCC presentèt lo trabalh qu’a desvolopat dempuèi 2010 a travèrs de totes los sieus sòcis en tèmas coma l’aiga, los bòsques, los risques naturals, la biodiversitat o los espleches de teledeteccion.

An de cambiaments

2013 es estat un an de cambiaments dins la CTP. En julhet prenguèt son cargue la nòva directora Cristina Prat, que dins los sièis meses passats a pogut prene lo pols al Consòrci e marcar d’objectius ambicioses que melhoraràn lo prètzfach de l’organisme.

Al delà, Andòrra presidís la CTP tre que lo 7 de novembre passat Navarra li passèsse lo testimòni dins lo XXXI Conselh Plenari que se celebrèt a Pampalona. Lo nòu president, Gilbert Saboya, Ministre dels Afars exteriors d’Andòrra e President de l’Organisme Andorran de Cooperacion transfrontalièra vei amb optimisme l’avenir de la region transfrontalièra , totjorn ligat a l’avançada de las politicas e dels projèctes de cooperacion.

Enjòcs 2014

Seguir en tot far promocion de la cooperacion transfrontalièra e far prene consciéncia als abitants del territòri de la siá importància son los grands objectius de la CTP per l’an que ven. La CTP vòl centrar los esfòrces per que los abitants del territòri d’accion de la CTP participen e conegan lo besonh e los beneficis de la cooperacion transfrontalièra. Solament amb l’ajuda de totes poirem aténher los melhors resultats e melhorar la vida vidanta de sos vesins.

Per aquò la CTP contunharà de trabalhar per capitar d’èsser l’autoritat de la gestion del programa que ven de cooperacion territoriala Espanha-França-Andòrra 2014-2020. La CTP foguèt nomenada l’Autoritat de Gestion del programa precedent. Dins aquel encastre, la CTP es un actor de primièr nivèl a escala europèa per çò qu’es de cooperacion transfrontalièra e es la primièra entitat transfrontalièra en Euròpa que gerís un programa europèu.

Lo nòstre sòmi es seguir d’aprofechar aquela experiéncia unica per ajudar a melhorar la vida dels abitants dels Pirenèus.