Sètz preparant vòstra candidatura a aquel apèl a projèctes? Aquela jornada es per vosautres. Tota la còla del POCTEFA serà presenta per vos ajudar dins l’elaboracion de vòstra candidatura e vos balhar los darrièrs conselhs abans de la presentar formalament al Programa. Profechatz d’aquela oportunitat, l’apèl a projèctes se clau lo 3 de mai que ven, es la darrièra linha drecha.

 

Al programa de la jornada: presentacion del contèxt europenc amb un expèrt d’Interact, finançament FEDER, autofinançament e cofinançaments publics, obligacions en matèria de passacion de mercats publics e de publicitat, legislacion sus las ajudas d’Estat… Un zom particular serà fach sus l’importància dels indicators e l’evaluacion de las resultas. E plan segur, las escasenças de rescontras e d’escambis, los portaires de projèctes del programa e los tecnicians del POCTEFA seràn multiples.

Per rapèl, lo Programa Operacional de Cooperacion Territoriala Espanha-França-Andòrra es finançat per l’Union europenca per un budgèt total d’environ 168 millions d’Euròs del Fons Europenc de Desvolopament Regional (FEDER). L’envolopa que demòra per aquel novèl apèl a projèctes s’enauça a 29,5 millions d’Euròs de FEDER e lo taus d’intervencion del FEDER es establit a nautor de 65% del còst total eligible de las operacions. La Comunautat de Trabalh dels Pirenèus es autoritat de gestion d’aquel programa europenc.

Mai d’informacion sul siti del POCTEFA