La signatura avuèi del Protocòl qu’emenda lo Tractat de Baiona permet d’integrar lo Principat d’Andòrra dins aquela convencion de cooperacion transfrontalièra entre França e Espanha, soscrita en 1995.
Lo Protocòl d’emendament e d’adesion d’Andòrra al Tractat sus la cooperacion transfrontalièra entre organismes territorials redigit a Baiona lo 10 de març de 2005, a per tòca la participacion d’Andòrra al regim de cooperacion transfrontalièra entre organismes territorials pirenencs de França e d’Espanha.
Lo present Protocòl permetrà tanben a Andòrra d’èstre membre de plen dreit del Consòrci de la Comunautat de trabalh del Pirenèus, cargat de la gestion del programa de cooperacion territoriala Espanha-França-Andòrra, amb una dotacion de fonses comunautaris (FEDER) de 168 milions d’èuros pel periòde 2007-2013. De fèit, lo Principat fa part del Consòrci coma membre observador dempuèi 2006, l’annada de sa creacion.
Andòrra contribuís pas al budgèt comunautari e donc pòt pas aprofieitar dirèctament fonses comunautaris; pr’aquò, lo règlament del FEDER prevetz que los fonses a concurréncia maximala de 10 % se pòden destinar al profièit d’un territòri d’un Estat tèrç, çò que permet a Andòrra sa participacion als projèctes. De la meteissa manièra, una infraestructura finançada per l’UE se poiriá crear, totjorn amb la collaboracion dels partenaris dels païses vesins.
Per remediar a la diferéncia d’estatut entre lo Principat coma Estat e los organismes territorials decentralizats, lo governament andorran deurà crear un organisme de cooperacion transfrontalièra de tipe mixte amb representants del Governament e de las municipalitats que se cargarà de desvolopar los projèctes de cooperacion transfrontalièra en collaboracion amb los organismes dels païses vesins.
Aqueste matin, lo Ministre dels afars estrangièrs e de las relacions institucionalas d’Andòrra, Xavier Espot; l’ambaissador espanhòl, Eugeni Bregolat e l’ambaishador francés, Gilles Chouraqui an agut l’onor de signar lo Protocòl qu’emenda lo Tractat de Baiona. Après la signatura, lo Conselh general andorran lo deurà aprovar.
