Mercés als presentadors d’aquela conferéncia, qu’an per tòca difóner las prepausas de la Comission e iniciar lo debat sus cossí nos caldrà afrontar la futura organizacion dels Fons, e mai concrètament de la Cooperacion Territoriala Europèa, que periòde a periòde ganha importància dins l’encastre de la Coesion. En fach, dins las perspectivas financièras, la Comission prepausa una aumentacion del Fons FEDER destinat a la Cooperacion de mai de 2 bilions d’èuros en comparason amb lo periòde 2007-2013.

Cal remembrar que la Comission europèa presentèt en junh de 2011 las perspectivas financièras pel periòde 2014-2020. Aquel paquet budgetari deu èsser encara debatut e aprovat pel Conselh de l’Union e lo Parlament Europèu, mas avèm ja qualques pistas per saber ont anarà l’ensemble del finançament europèu dins los ans a venir. Dins aquel paquet, la Politica de Coesion a totjorn ocupat una posicion predominanta (dins lo periòde 2007-2013 absorba mai de 35% del total), e contunharà d’o far: dins aquel paquet se prepausa que mai de 36% del total budgetari se consacre a la Coesion Economica, Sociala e Territoriala.

Un còp perfiladas las quantitats destinadas a la Coesion, cal saber cossí se van distribuir. Los desparièrs fons e las prepausas de programas que foncionaràn entre 2014 e 2020 foguèron objècte d’una autra prepausa de la part de la Comission europèa: en octòbre de 2011 se presentèron las prepausas de Reglaments que definiràn los Fons del Marc Estrategic Comun, ont se tròba la Coesion. Un autre còp, aquel paquet aurà d’èsser debatut e aprovat pel Conselh e lo Parlament, mas permet ja als programas e a las autoritats actualas de se preparar l’avenir.