Aital, amassats a l’entorn del projècte “2011 – An dels Pirenèus”, l’ensems dels territòris de la CTP a participat al desvolopament de l’imatge e del prestigi dels Pirenèus. Pel primièr còp, los professionals de torisme franceses, espanhòls e andorrans an trabalhat amassa, al servici dels Pirenèus. Aquela iniciativa a mes en relèu l’existéncia d’un territòri viu e dinamic, mai que mai a travèrs dels 400 eveniments qu’an participat an aquela operacion. Aprofèchi l’escasença per mercejar personalament a cadun d’eles perque l’An dels Pirenèus a gaudit d’una programacion de qualitat.

2011 es estat tanben un an clau per l’Observatòri Pirenenc del Cambiament Climatic, qu’a atengut velocitat de crosièra mercés a la creacion del siti web e mercés a l’estudi sus adaptacion. Aquel Observatòri es un ais estrategic d’accion per la CTP, perque lo cambiament climatic se pòt ja observar als Pirenèus. Aquela realitat exigís que nos anticipem a l’efièch del cambiament climatic en preparant a partir d’ara d’estrategias d’adaptacion dels territòris, mai que mai pels sectors economics e los espacis naturals mai vulnerables. Mercés a l’Observatòri Pirenenc del Cambiament Climatic, la CTP balha als territòris un utís d’ajuda per la presa de decisions politicas per afrontar las adaptacions qu’exigisson los efièches del cambiament climatic.

Divèrses exemples mòstran que, en trabalhant amassa a travèrs de la CTP, tot lo territòri amassa se fa mai fòrt e pòt se preparar melhor per l’avenidor.

Una cooperacion que se viu d’un biais quotidian a travèrs del programa de cooperacion territorial europèu POCTEFA, que la CTP s’encarga de la gestion. Referent a aquò, l’an 2011 es estat una annada malaisida a causa de la revision del sistèma de contraròtle e certificacion que permet a l’ora d’ara garantir los pagaments pendent lo primièr trimèstre de 2011. En 2011 s’es tanben començada una nòva convocacion de projèctes, que permetrà programar nòus projèctes per la debuta de l’an 2012. Per un autre costat, 2011 marca l’inici dels preparatius de l’avenent periòde de programas europèus 2014-2020. La Comission Europèa a realizat divèrsas prepausas de tèxt per la futura politica de coesion europèa, e tanplan per la futura reglamentacion europèa. Aqueles preparatius van èsser lo nòstre clar objectiu e lo nòstre ais d’accion pendent los 2 ans avenents.

A l’ora d’ara, una de las prioritats per la CTP es, en efièch, preparar la siá candidatura per gerir los fons europèus de cooperacion territoriala pel periòde 2014-2020. En se valent de son experiéncia unica en gestion transfrontalièra integrada e de l’innovacion de la que n’es cresençadièra amb vistas al renfortiment de l’integracion territoriala europèa, la CTP anoncièt a la Comission Europèa e als Estats membres, pendent lo Conselh plenari celebrat lo 28 d’octòbre a Tolosa, que, quand lo moment serà arribat, presentarà sa candidatura per gerir los fons europèus de cooperacion transfrontalièra pel periòde 2014-2020 e, amb aquel objectiu, nos preparam tre l’ora d’ara per la generacion de programas que ven.

Qui serà melhor que l’ensems de territòris que representa la CTP per s’implicar en l’ensems del territòri? L’an 2012, la CTP celebrarà sos 30 ans. 30 ans d’experiéncia en cooperacion al servici del territòri. 30 ans de cooperacion per convertir la frontièra en un luòc d’amassada e d’escambi amb sonque una tòca: lo desvolopament armoniós e durable de tota la zòna frontalièra. L’an 2012 serà tanben l’an de l’entrada d’Andòrra dins lo Consòrci de la CTP a travèrs del sieu organisme de cooperacion, l’OACT (Organisme Andorran de Cooperacion transfrontalièra). S’agís d’una vertadièra reconeissença de la part dels Estats francés e espanhòl, aital coma dins lo contèxt europèu d’aquel membre de plen drech de la CTP dempuèi las siás originas.

La CTP trabalha per la reconeissença e lo desvolopament d’un territòri unic en Euròpa, respectuós de las siás riquesas naturalas, que favorís una economia locala verda capabla de protegir son entorn pendent se sosten d’aquelas riquesas, qu’es al bòrd dels sieus abitants amb produches de qualitat que son disponibles al long de tota la frontièra. En contunhant per aquela via de la cooperacion, sèm mai fòrts. Dins la nòstra vida quotidiana, marcada per la crisi, la cooperacion es una alternativa sus la que la CTP vòl pariar. E ieu vos convidi a pariar amb nosautres.

 

Tota la còla de la CTP vos desira bonas fèstas e gaug per l’an 2012.

Xavier Bernard Sans, director
e tota la còla de la CTP