TOLOSA – Garona-Nauta (31) – Miègjorn-Pirenèus
Amassada Generala de la CTP – 23 d’octobre de 2009
Lo 23 de novembre que ven, los Presidents de la Comunautat de Trabalh dels Pirenèus se trobaràn a Tolosa amb l’objectiu d’escambiar sus la question de las orientacions prepausadas per la Region Miègjorn-Pirenèus per sa presidéncia de la CTP (2009-2011).
Coma mencionat a l’ocasion del Conselh Plenari de la Comunautat de Trabalh dels Pirenèus (CTP) de Montpelhièr, en octobre passat, la Presidéncia Miègjorn-Pirenèus compta tornar afirmar la vocacion “montanha” d’aquesta institucion per que siá un instrument eficaç al servici dels Pirenèus e de son avenir.
Atal desira reforçar l’identitat, l’atractivitat e la visibilitat del massís, tot en assegurant son desvolopament sostenible.
Dins aqueste sens, se prepausaràn, per tota la cadena, 2 òbras de granda envergadura que faràn intervenir totis los membres de la CTP:
· una iniciativa ligada a l’observacion del cambiament climatic dins los Pirenèus, coma es lo cas per las cooperacions ja menadas sus autres massisses coma los Alps
· lo lançament d’una granda operacion de promocion dels Pirenèus, per delà las frontièras del territòri de la CTP, en tèrmes de torisme e de comunicacion amb entre autres objectius de far de “2011, l’Annada dels Pirenèus”.
D’un autre costat, al cors de sa presidéncia, la Region Miègjorn-Pirenèus prevetz de sostenir las accions que permeten de melhorar la reconeissença e l’estudi dels enjòcs e de las especificitats del territòri de la CTP, e tot particularament dels Pirenèus, alprèp de las instàncias nacionalas e europèas.
Se perseguiràn las iniciativas que gaitan d’acompanhar la modernizacion de la CTP e especialament l’integracion d’Andòrra al còr de son Consòrci.
Enfin, per delà son avenir, la CTP s’engatjarà tanben al cors de las 2 annadas que venen a dessenhar lo futur que desira ofrir a son territòri, gràcias a la definicion d’un Plan d’accions estrategic de la CTP per 5 ans.
