Del 2 al 22 de novembre, l’artista premiada al concors “Frontièra, espaci de cooperacion” Amaia Gracia expausèt las siás òbras dins lo centre de produccion artistica de Bilbao Arte.
Lo projècte “QUIERO mi montaña”, tracha “la construccion del païsatge contemporanèu”. Es la creacion del païsatge amb una referéncia de caire autobiografic, fisèl a la cartografia e ubicacion del luòc. Lo luòc: Los Pirenèus, concrètament, los Pirenèus Atlantics e los Nauts Pirenèus.
A partir de qualques unas de las citas del tèxt Introducción: sobre el paisaje y su construcción de Javier Maderuelo, sul concèpte de païsatge e de cossí se construís, aquel artista representa la construccion de l’idèa de montanha e de l’idèa de païsatge a partir de l’emplec de divèrses procediments: la serigrafia –coma mejan de reproduccion en cadena–, la fotografia –coma mejan de translacion de part d’un païsatge– e l’escultura –coma mejan per la siá consruccion tridimensionala. Desparièrs punts de vista o de nivèls de representacion que li apòrtan un caractèr multidisciplinari a l’expression d’una meteissa idèa o concèpte.
Cal remembrar qu’Amaia Gracia, (Pamplona, 1985) a resultat ganhanta del concors “Frontièra, espaci de cooperacion” amb la siá òbra “Pirenaico expandido”, trabalh de 35 x 50 cm x 70cm de nautor, creada amb de fèrre, contraplaca, fibra de veire, miralh, esmalt e una mapa.
Mai d’informacions sus l’exposicion.
