A partir de dijòus 3 de novembre venètz descobrir a la Ciutat de l’espaci de Tolosa un nòu circuit entre Catalonha e Miègjorn-Pirenèus e partissètz a l’investigacion de las originas de la vida e de l’Univèrs a travèrs de la visita de l’exposicion itineranta.
La Rota de las Originas amassa sièis institucions espanhòlas e francesas a l’entorn d’una meteissa tòca: far partejar las coneissenças scientificas del patrimòni pirenenc sul tèma de las originas de l’Univèrs e de l’Òme. La Rota de las Originas es un recorregut cultural original que permetrà al grand public, coma als escolars, de descobrir sul territòri pirenenc, las multiplas investigacions dels scientifics, sus l’Univèrs e los primièrs abitants de la Tèrra. Cada estapa del recorregut presentarà un periòde precís de la nòstra evolucion e lo recorregut complet porgirà una vision globala de las originas, dempuèi lo Big Bang, jusqu’a l’aparicion de l’umanitat. Pel public, las experiéncias seràn multiplas, dempuèi la descobèrta de luòcs paléontologics e arqueologics, l’observacion del cèl e l’exploration de l’Univèrs, fins a l’estudi de la biodiversitat pirenenca.
Los actors franceses d’aquel projècte son la Ciutat de l’espaci, lo Musèu d’Istòria Naturala de Tolosa e lo siti À Ciel Ouvert de Florença dins lo Gers. Los partenaris espanhòls son lo Centre d’Estudis del Patrimòni Arqueologic de la Preistòria de l’Universitat de Barcelona (CEPAP-UAB), lo Centre d’observacion de l’Univèrs de Montsec a Àger e l’Associacion Investigacion e Vulgarization del Patrimòni Istoric a Llorenç (ARDPH).
Aquel projècte comun compren la creacion d’una exposicion itineranta sul tèma de las originas que recorrerà lo territòri pirenenc pendent mantunas annadas, lo desvolopament d’un recorregut toristic e educatiu permanent compausat d’animacions individualas concebudas pels partenaris dels dos costats de la frontièra, e la creacion d’una exposicion permanenta sus las originas de la vida e de l’Univèrs, dins la Ciutat de l’espaci.
La coeréncia del circuit e de las exposicions realizadas en comun pels sòcis permetràn al public de descobrir la totalitat del territòri, tant catalan que francés, en apreciant las especificitats de cada luòc. Lo circuit La Rota de las Originas s’adreça a totes los publics: familhals, escolars e de grops de torisme.
Aquel projècte es finançat per la Comunitat Europèa e lo fons europèu de desvolopament regional. Aquela iniciativa transfrontalièra e pluridisciplinària s’inscriu dins lo programa operacional de collaboracion territoriala Espanha-França-Andòrra 2007-2013.
