Euròpa
Mentre que l’ONU a declarat l’annada 2010 “Annada internacionala de la biodiversitat”, la Comission europèa publiquèt lo 19 de genièr, una comunicacion que descriu las “Opcions possiblas per l’apuèi 2010 per çò qu’es de la perspectiva e dels objectius de l’Union Europèa en matèria de biodiversitat”.

Atal aquela publicacion deu preparar la posicion de l’Union Europèa al moment de la Conferéncia mondiala de l’ONU sus la diversitat biologica que se tendrà a Nagoya (Japon) en octobre de 2010.

Partant del constat que l’objectiu fixat per l’UE de redusir l’erosion de la biodiversitat d’ací 2010 serà pas atenhut, la Comission presenta 4 objectius opcionals a aténher d’ací 2020.

  • Opcion 1: frenar significativament lo ritme de pèrdia de biodiversitat e de servicis ecosistemics dins l’UE d’ací 2020.
  • Opcion 2: aturar la pèrdia de biodiversitat e de servicis ecosistemics dins l’UE d’ací 2020.
  • Opcion 3: aturar la pèrdia de biodiversitat e de servicis ecosistemics dins l’UE d’ací 2020 e assegurar son restabliment autant que possible.
  • Opcion 4: aturar la pèrdia de biodiversitat e de servicis ecosistemics dins l’UE d’ací 2020 e assegurar son restabliment autant que possible, e renfortir la contribucion de l’UE a la prevencion de la pèrdia de biodiversitat.

Per mesurar los progrèsses realizats, se definirà un nivèl de referéncia scientific relatiu a l’estat de la biodiversitat e dels servicis ecosistemics en Euròpa.

D’un autre costat, la Comission desira una avaluacion dels fonses necessaris a la gestion dels sitis Natura 2000 tanplan coma un renfortiment de la politica de desvolopament rural per desvolopar los servicis ecosistemics.

Sus la basa d’aquesta comunicacion e dels debats que farà nàisser, la Comission europèa presentarà una estrategia de l’UE en matèria de biodiversitat per la fin de l’annada.

Telecargar la comunicacion