Lo primièr seminari europèu sus l’observacion dels territòris transfrontalièrs s’es debanat lo 10 de decembre passat a Nancí. Aquel eveniment foguèt organizat per la MOT, la DATAR e la FNAU que trabalhan amassa al bastiment d’una observacion transfrontalièra capitalizada a escala francesa.
Cal remembrar los enjòcs d’aqueles territòris. Cada jorn, de centenats de milièrs de personas afranquisson las frontièras, per trabalhar, consomar, accedir a servicis, o simplament escambiar amb los lors vesins.
Aital en França, près de 340.000 personas que demòran en proximitat d’una frontièra, trabalhan dins lo país vesin. Aquel fenomèn a fach emergir d’autentics bacins de vida transfrontalièrs, dins los quals de procediments pilòt de collaboracion transfrontalièra se son meses en marcha amb la tòca de respondre als problèmas que ne resultan.
Aqueles territòris, per plan grandas aglomeracions transfrontalièras, devon doncas bastir de projèctes comuns, urbans, socioeconomics, environamentals, eca.; e an de besonh, per i arribar, d’espleches de coneissença amb la tòca de deschifrar los fenomèns transfrontalièrs.
Uèi, aquelas donadas sonque existisson pontualament e parcialament; son rarament transfrontalièras o comparablas d’un territòri a l’autre. Aquela “observacion”, encara embrionària, es pasmens essenciala per menar una politica eficaça de disposicion dels territòris transfrontalièrs.
Aqueles enjòcs importants de disposicion del territòri èran al còr dels debats del seminari.
Lo seminari foguèt egalament l’escasença d’un debat a l’entorn de las esperas dels actors locals e las evolucions necessàrias per arribar a una autentica observacion transfrontalièra, a nivèl local, nacional e europèu.
Per ne saber mai, descargatz lo dorsièr de premsa en francés.