Dijòus 27 d’octòbre Navarra a pres la presidéncia de la Comunitat de Trabalh dels Pirenèus a l’escasença del Conselh plenari de la CTP celebrat a Tolosa (Miègjorn-Pirenèus).

Als tèrmes de l’amassada los Presidents dels territòris membres de la CTP an adoptat una «declaracion comuna per l’interconnexion de las linhas ferroviàrias plaçadas a l’un costat e l’autre dels Pirenèus» (Telecargatz lo document en francés e en espanhòl).

Los Presidents prenon acte de las proposicions de la Comission europèa relativas a la politica de coesion pel periòd 2014-2020 publicadas lo 6 d’octobre de 2011 e apèlan los Estats e lo Parlament europèu los sostenir.

Dins aquel encastre, e al nom de la Comunautat de Trabalh dels Pirenèus (CTP), actor major al plan europèu de la cooperacion transfrontalièira, se felicitan de la plaça importanta consacrada a la cooperacion transfrontalièira dins aquelas proposicions.

An aquela escasença, desiran rapelar que la CTP es la primièira entitat transfrontalièira en Euròpa gestionària dempuèi 2007 d’un programa europèu.

Fòrta d’aquela experiéncia unica de gestion transfrontalièira integrida e de l’innovacion qu’es portaira dins la via d’un afortiment de l’integracion territoriala europèa, la CTP anoncia a la Comission europèa e als Estats membres, que se portarà al moment vengut, candidata a la gestion dels fonses europèus de cooperacion transfrontalièira pel periòd 2014-2020, e an aquel efièch nos preparam d’ara ençà per la generacion de programas que ven.

Los presidents se son felicitats de la capitada d’aquel Conselh plenari qu’a amassat 600 actors sòcioeconomics de la zòna transfrontalièra en despiech de l’agression patida per Yolanda Barcina, Presidenta de la comunitat forala de Navarra.

En efièch, al moment de la taula redonda publica, la Presidenta es estada l’objècte d’una agression de la part d’opausaires a la linha a granda velocitat. Una enquèsta de la polícia nacionala francesa es en cors e la region Miègjorn Pirenèus a portat planh. Après una interrupcion de session, la Presidenta a pres la taula redonda jols aplaudiments caloroses dels participants.

L’amassa dels Presidents, qu’an condemnat l’agression, an saludat la siá sang freda.

 

D’aisses estrategics fòrts per la nòvela presidéncia

En escasença del sieu discors de presa de presidéncia, Yolanda Barcina a mostrat la siá determinacion a se daissar pas intimidar per actes vils e gratuits e a afirmat qu’en tant que Presidenta de la CTP contunhariá a sosténer los projèctes d’aisses ferroviaris Atlantic, Mediterranèu e per la traversada centrala dels Pirenèus. De contunh a expausat los aisses fòrts de l’estrategia per la CTP pels dos ans a venir:

  •  Gerir la segonda crida a Projècte del Programa operacional de collaboracion territoriala Espanha-França-Andòrra e far la promocion davant la comission europèa de la candidatura de la CTP a la gestion dels fons europèus per la collaboracion transfrontalièra 2014-2020
  • Perenejar projèctes iniciats per la Presidéncia de Miègjorn-Pirenèus en particular aquela de l’Observatòri pirenenc del cambiament climatic
  • Finalizar la darrièra fasa de l’evolucion juridica de la CTP, en formalizant l’adesion del principat d’Andòrra a la CTP.
  • Favorir de projèctes de collaboracion transfrontalièra orientats cap a un creissement intelligent, durable e integrador dins l’encastre de l’estrategia europèa 2020. E contunhar a refortilhar lo ròtle de la CTP sus la scèna europèa per ne far un interlocutor clau sus tèmas coma la politica de coesion sociala, infrastructuras e transpòrts.
  • Promòure d’accions orientadas cap al desvolopament durable coma la constitucion d’un malhum dels espacis naturals pirenencs.
  • Desvolopar d’activitats de torisme durable per professionalizar lo sector del Torisme e balhar de vam a la marca Pirineos/Pyrénées.