Pampalona aculhirà lo jorn 6 de novembre que ven lo primièr Collòqui internacional sus cambiament climatic dins las zònas de montanha, una ocasion unica per conéisser las bonas practicas desvolopadas dins cada territòri per afrontar aquel enjòc important.

L’Observatòri Pirenenc del Cambiament Climatic (OPCC) celebrarà dins la capitala navarresa un collòqui jol lèma “Observar per s’adaptar”, ont s’analisaràn los risques que somet lo cambiament climatic per las zònas de montanha. Aquela amassada internacionala se debanarà dins lo Planetari de Pampalona, e a el assistiràn de scientifics, d’autoritats europèas, nacionalas e regionalas, d’agents socials e economics… Totes eles analisaràn la situacion actuala de las zònas de montanha e las perspectivas de futur dins un espaci mai que mai sensible a las alteracions del climat. S’examinaràn tanben amb especiala atencion las desparièras estrategias d’adaptacion que se menan a tèrme dins las zònas de montanha transfrontalièras. Al ser, l’OPCC presentarà los resultats atenguts per aquel projècte pionièr en l’estudi del cambiament climatic dins airals de montanha.

L’OPCC es una iniciativa innovanta a nivèl europèu per l’estudi del cambiament climatic dins las zònas de montanha. Es estat començat per la Comunitat de Trabalh dels Pirenèus (CTP) e a comptat amb lo finançament del Programa Operatiu de Cooperacion Territoriala Espanha-França-Andòrra 2007-2013 (POCTEFA).

Podètz consultar lo programa e vos inscriure al Collòqui Internacional OPCC. Inscripcion gratuita fins a completar la capacitat d’aculhiment.

Aprofechatz lo vòstre sojorn a Pampalona per assistir a mai eveniments sus cambiament climatic!

La XXVIII edicion del Congrès Internacional de Comunicacion (CICOM) sus cambiament climatic, que se debanarà a Pampalona (Espanha) los 7 e 8 de novembre de 2013, tractarà d’aspèctes restacats a l’interaccion entre lo jornalisme e la comunicacion sus environament, e en particular sul cambiament climatic. Per veire lo programa e los ponents, cachatz aicí.

Nòta: Los assistents al Collòqui Internacional OPCC auràn d’avantatjas per assistir al Congrès Internacional de Comunicacion – CICOM. Per vos inscriure cachatz aicí.

Lo 5 de novembre comença lo Festival Internacional de Television per la Conservacion e Divulgacion de la Natura Telenatura. Cada ser a 19h30 poiretz assistir a la projeccion dels documentaris finalistas dins lo Planetari de Pampalona. De pas mancar!