Lo Malhum Transfrontalièr de l’Economia Sociala e Solidària TESS a amassat lo dimècres 1 de febrièr dins lo Palai Kursaal de Donostia-San Sebastián las desparièras familhas de l’Economia Sociala dins la primièra jornada d’aquestas caracteristicas que se celèbra en Euskadi.
L’amassada, qu’es estada clavada per la conselhièra d’Emplec e Afars Socials del Govèrn Basc, Gemma Zabaleta, (veire vidèo) a servit a metre en relèu l’importància d’aqueste modèl de gestion, coma un biais positiu d’afrontar la crisi e de reconsiderar lo ròtle que deu jogar l’economia dins la nòstra societat. La conselhièra, encargada de clavar l’acte, a destacat l’Economia Sociala coma un biais de gestion responsable, “qu’a demostrat que la racionalitat economica e lo progrès social son pas incompatibles.”

La jornada, organizada per la Confederacion de Cooperativas, Konfekoop, sòci de TESS, amassa amb l’Associacion Navarresa d’Entrepresas Laboralas, ANEL e la Chambre Régionale de l’Économie Sociale et Solidaire d’Aquitaine, CRESS Aquitània, es estada inaugurada per de representants de las tres organizacions sòcias de TESS. D’abòrd, lo president d’ANEL, Luís María Gallo, a destacat l’importància d’aquela amassada “per començar las dinamicas de coneissença mutuala e las sinergias” e a remarcat que la cooperacion es “clau” pr’amor de las dimensions de las entrepresas. “Èsser competitius e eficaces sens quitar d’èsser generoses e participatius e amb la tòca de generar d’emplec”. Pendent la jornada, s’es soslinhada l’importància de primar las personas e non pas lo capital per capitar en favor del desvolopament durable e l’interès general. Qualques chifras, que demòstran que l’Economia Sociala permet la creacion d’emplecs estables e de qualitat, son estadas expausadas. En Euskadi representa 8,9% de l’emplec, en Navarra 3,6% e en Pirenèus Atlantics (França) 9,8%. En 2010, en Euskadi 80.696 personas èran emplegadas en entrepresas d’Economia Sociala, chifra que s’èra redusida en 1,2% quant a 2009, del temps que lo total de trabalhaires dins la comunitat davalèt 4,9%.

Lo Malhum Transfrontalièr de l’Economia Sociala e Solidària, apelat Projècte TESS, es una iniciativa de cooperacion per refortilhar lo ròtle de l’Economia Sociala dins lo desvolopament social e economic dins lo territòri transfrontalièr de Navarra, Aquitània e Euskadi.
Lo malhum nais de la man de tres sòcis: ANEL (Associacion Navarra d’Entrepresas Laboralas), que lidera lo projècte, KONFEKOOP, la Confederacion de Cooperativas d’Euskadi; e CRESS Aquitaine, la Chambre Régionale de l’Économie Sociale et Solidaire d’Aquitaine. Aqueste projècte es finançat a 65% per fons FEDER a travèrs del Programa de Cooperacion Territoriala Espanha-França-Andòrra 2007-2013. Ne son las siás tòcas:
• Refortilhar lo ròtle de l’Economia Sociala dins lo desvolopament social e economic del territòri transfrontalièr d’Aquitània, Navarra e Euskadi.
• Començar una dinamica de trabalh continú entre las organizacions d’Economia Sociala dels territòris transfrontalièrs.
• Incrementar la visibilitat de l’Economia Sociala dins lo territòri transfrontalièr.
• Fomentar l’Economia Sociala coma mecanisme efectiu d’insercion laborala e de creacion d’emplecs de qualitat.

Al delà, la jornada s’es barrada amb la lectura d’un manifèst, que las organizacions de l’Economia Sociala en Euskadi s’i son engatjadas, per la creacion e mantenença dels emplecs, per rapòrt a d’autras mesuras de superacion de la crisi economica. (veire vidèo)