Cristina Prat, directora de la Comunautat de Trabalh dels Pirenèus (CTP), presentèt a Brusselas los resultats de la campanha de comunicacion per la promocion del programa POCTEFA desvolopada en 2013.
L’intervencion de la directora de la CTP se debanèt lo 10 de decembre dins l’encastre de las jornadas “Telling the story” organizadas per la Comission Europèa sus comunicacion e fonzes europèus.

La campanha per la difusion del Programa POCTEFA e sos projèctes comprenguèt la creacion de la DOCUweb e sa difusion a travèrs d’una campanha en linha de publicitat.

De mai, la CTP creèt un vidèo per promòure lo programa amb d’exemples de qualques projèctes de cooperacion transnacionala desvolopats jol parapluèja del POCTEFA 2007-2013.

Cristina Prat concluguèt sa presentacion amb l’avançada dels enjòcs de comunicacion pels ans a venir e amb las linhas a seguir amb la tòca finala de garentir la visibilitat de la contribucion de l’Union Europèa davant los territòris e lors abitants.