Lo sèti administratiu de la CTP s’es mudat al bastiment de l’Institut Pirenenc d’Ecologia (IPE). Lo sèti istoric de l’entitat es encara la Torre del Relòtge. La CTP e la comuna de Jaca signan una convencion de collaboracion.
Lo burèu del Consòrci de la Comunautat de Trabalh dels Pirenèus (CTP), situat fins ara al Palais de Congrèsses de Jaca, s’es mudat al bastiment de l’Institut Pirenenc d’Ecologia, situat a l’avenguda de Nòstra Dòna de la Victòria, tanben a Jaca.

Dempuèi sa naissença, fa mai de trenta annadas, lo Consòrci de la CTP a agut son sèti a Jaca, pr’amor de la situacion estrategica de la ciutat respècte a las regions sòcias e de las bonas relacions qu’an agut totjorn lo consòrci e la comuna. Lo Palais de Congrèsses s’es servit pendent d’annadas coma sèti administratiu del consòrci, mas a l’ora d’ara, las installacions modèrnas de l’IPE s’adaptan mèlhor al bessonh tecnologic e d’organisacion de l’organisme. Lo sèti istoric de la CTP serà, coma fins ara, la Torre del Relòtge en plen centre de Jaca.

Al començament del mes de mai, lo president de la CTP, lo sènher Gilbert Saboya Sunyé visitèt Jaca a l’escasença del Jorn de l’Euròpa e declarèt son sosten a manténer lo sèti del consòrci a la ciutat aragonesa.

Convencion de collaboracion
La CTP e la comuna de Jaca an signat una convencion de collaboracion gràcias a la qual lo consòrci e la comuna mantendran las bonas relacions qu’an dempuèi mai de trenta ans. Gràcias a aquela convencion, la CTP balharà assisténcia tecnica a la comuna dins lo desvolopament e presentacion dels projèctes enquadrats dins del Programa Operatiu Espanha-França-Andòrra. Dins l’encastre de collaboracion establit, la Comunautat de Trabalh dels Pirenèus podrà utilizar las salas e peças del Palais de Congrèsses e autras peças municipalas quand serà necessari e caldrà seguir lo procediment abitual de reservacion de salas e equipaments de la comuna, per la realizacion d’actes institucionals e de trabalh.