Lo dimècres 25 de genièr a Jaca, l’Universitat de Pau e dels Païses de l’Ador e l’Universitat de Saragossa an organizat un seminari balanç de las accions menadas amassa dempuèi 2 ans.

L’escasença de celebrar la collaboracion entre las doas estructuras e de mercejar los sòcis financièrs-institucionals, sustot europèus, a travèrs del programa POCTEFA-, que favorisson aquela collaboracion al benefici dels estudiants, dels professors, de la Recèrca e Desvolopament (ReD) mas tanben per totes los abitants d’aqueles territòris que benefician d’aquela collaboracion.

Los representants de las Institucions e de las universitats an largament comentat aquela collaboracion qu’existís dempuèi 10 ans e que s’es formalizada lo 20 de junh 2011 amb la signatura d’una convencion. Aquel projècte unic a la tòca de melhorar la qualitat de la ReD e mai largament de melhorar la qualitat de l’educacion. Explican qu’aquela convencion correspond a las estrategias regionalas mas tanben a l’estrategia europèa e met en evidéncia los enjòcs plan concrèts sus las questions per exemple de la cotutèla de tèsi, dels co-diplòmas, dels escambis univesitaris mas tanben de l’insercion dins lo mond del trabalh.

Per eles, aquela collaboracion remanda a una question de desvolopament dels territòris beneficiants d’universitats e de l’ensenhament superior. L’educacion e la formacion son enjòcs màgers e an un benefici evident suls territòris que mesuran la valor d’aver una educacion superiora en ligam amb los teissuts economics.

Manuel José López Pérez, rector de l’universitat de Saragossa clava aital la dubertura del seminari: «Aquela collaboracion es en tren d’èsser desvolopada de manièra modèsta mas es fòrça mai qu’una collaboracion en universitats. Çò qu’es en jòc, aquò es l’avenidor de la coneissença en Euròpa que passa per de fòrtas aliganças entre territòris. Uèi la situacion malaisida que travèrsa l’Euròpa deu pas empachar de gardar l’avenidor. E aquel futur passa per las regions de la coneissença, las regions de l’investigacion, las regions que trespassan las frontièras qu’existisson pas dins aqueste domeni.»

Veire la dubertura del seminari en vidèo.