Dijòus 19 de mai l’Aragon e los Pirenèus Atlantics signèron la convencion e los estatuts del Gropament Europenc de Cooperacion Territoriala «Espaci Portalet», 1èr GECT de drech espanhòl e 2nd de la frontièira francò espanhòla.
Previst per 10 ans, aquel GECT novèl serà governat per las doas collectivitas. Lo primièr projècte d’aquela nòva entitat serà lo projècte de viabilitat ivernala entre Biescas e Laruns. L’ancian bastiment de las doanas, situat sus la frontièira, costat espanhòl, vendrà "l’Espaci Portalet", centre de desnevament transfrontalièr al còl del Portalet. L’estiu, servirà de centre cultural e de jaç d’estapas sul camin de St Jacmes de Compostèla.
A mai long tèrme, lo GECT s’engatjarà sus d’autras tematicas coma la cultura, lo desvolopament economic o encara lo torisme. Lo sèti del GECT serà basat a Sabiñanigo. La primièira assemblada deliberanta s’amassarà aquel automne. La designacion dels presidents, lo budgèt, lo recrutament e la comunicacion i seràn a
l’òrdre del jorn per fin de permetre la mesa en fonccionament efectiva d’aquela nòva estructura de gestion de projèctes operacionals per las doas institucions.
