Lo darrièr 9 d’abrial s’inaugurèt a Prada del Conflent lo Centre Transfrontalièr d’Estudis Pau Casals, un edifici residencial reabilitat dins l’encastre del projècte de cooperacion CECASALS2 amb la finalitat d’i podèr aculhir curses, seminaris de formacion e entercambis de l’Universitat Catalana d’Estiu entre escolans franceses, espanhòls e andorrans.
Francesc Homs, conselhièr de Presidéncia de la Generalitat de Catalunya, presidiguèt l’acte d’inauguracion, al qual i assistiguèron tanben representants del Govèrn d’Andòrra, de las diputacions catalanas, del departament francés dels Pyrénées-Orientales e de la region del Languedoc-Roussillon, entre d’autras institucions.
Lo projècte CECASALS2, programat dins l’encastre del Programa Operatiu de Cooperacion Territoriala Espanha-França-Andòrra (POCTEFA), a permés la reabilitacion d’un edifici residencial de 600 mètres cairats, ont s’ubicaran las classas; e la construccion de dos edificis auxilars que serviràn de lotjament als estudiants. Lo còst total del projècte es estat de 2,15 milions d’euros, dels quals 1,3 vénon dels fons FEDER del POCTEFA.
Lo nou centre permetrà los entercambis transfrontalièrs entre los escolans franceses, espanhòls e andorrans pendent tot l’an, daissant un fòrt impacte economic en la zòna, fòra de l’epoca estivala.
Pere Roquet, secretari general de la CTP, assistiguèt a l’inauguracion e soslinhèt l’importància de la cooperacion transpirenenca en matèria de formacion e lo ròtle remarcable qu’a jogat lo POCTEFA 2007-2013 a l’ora de programar projèctes d’aquela natura, coma CECASALS2.
