Lo Comitat economic e sociau europèu (CESE) qu’organiza augan lo Prèmi solidaritat civiu a l’entorn deu tèma « La societat civiu contra lo COVID-19 ». Que’s premiaràn las iniciativas creativas e eficaças de particulars, organizacions de la societat civiu e enterpresas privadas qui ajan contribuït de faiçon notabla a har front a l’emergéncia deu COVID-19 e a las soas consequéncias grèvas e multiplas.
Dab aqueth prèmi, lo CESE, organe de l’UE que da votz a las ONG, los sindicats e las organizacions d’enterpresas dens l’encastre de l’Union, qu’a per mira de har conéisher miélher aqueras iniciativas, har préner consciéncia deu lor impacte e har aunor atau a tot aqueth monde qui an lutat contra lo coronavirus.
Lo CESE qu’autrejarà dinc a vint e nau prèmis, dab ua dotacion de 10 000 euros cadun, a iniciativas presas dens lo territòri de l’UE o lo Reiaume Unit. Que s’autrejaràn vint e sèt prèmis a projèctes realizats dens los Estats sòcis, un a ua iniciativa deu Reiaume Unit e un darrèr a un projècte d’endom transfrontalèr o europèu.
Totas las iniciativas, en includir las presentadas per enterpresas a but lucratiu, qu’auràn d’estar shens but lucratiu e ne poderàn pas beneficiar de mei de 50 % de finançament public.
Las iniciativas perpausadas entau Prèmi que pòden abordar ua garba espandida de tèmas, com accions ligadas a la santat o l’equipament sanitari o mesuras especificas destinadas a ajudar a las personas o aus grops mei hreitós, desfavorizats o vulnerables (en includir los refugiats), enter autes.
Lo delai de presentacion de candidaturas que s’acabarà lo 30 de seteme de 2020.
Informacion mei :
