Botanistas espanhòls, franceses e andorrans de las regions de la Comunautat de Trabalh dels Pirenèus (CTP) an trabalhat pendent tres annadas dins l’encastre de l’Observatòri Pirenenc del Cambiament Climatic (OPCC) per elaborar lo primièr Atlas de la Flòra dels Pirenèus.
S’agís d’una experiéncia unica fins ara qu’a permés confrontar mai de dos milions de registres de flòra e descriure al detalh lo segond ecosistèma mai ric d’Euròpa en biodiversitat de flòra, amb mai de 4.500 espècias de plantas.
L’Atlas es disponible a travèrs d’una plataforma en linha que permèt consultar las mapas de distribucion e fichas biologicas de las plantas qu’abitan los Pirenèus e realizar de recèrcas per nom scientific o per quadrilatge UTM.
