Lo diluns 3 de novembre, los responsables màgers de la Diputación Provincial de Huesca e del Conseil Général des Hautes-Pyrénées, Antonio Cosculluela e Michel Pélieu, soscriguèron formalament la convencion que constituís l’Agropacion Europèa de Cooperacion Territoriala (AECT) ‘Huesca Pirineos-Hautes Pyrénées’ (HP-HP).

L’AECT ‘Huesca Pirineos-Hautes Pyrénées‘ s’agís d’un nòu esplech de cooperacion a escala comunitària que facilitarà l’aparicion e lo desvolopament de projèctes de cooperacion territoriala mai eficients dempuèi la perspectiva de la programacion de fons europèus pel periòde 2014-2020. D’aquesta manièra, lo Centre de Cooperacion Transfrontalièra HP-HP aquerís un esplech de cooperacion dotada de personalitat juridica pròpria e autonomia financièra.

L’idèa exprimida pels dos sòcis passa per "far del Pirenèu Central un encastre de cooperacion economica”, que la Diputación Provincial de Huesca e lo Département Hautes-Pyrénées trabalhan de la man per impulsar l’economia, mobilizar las entrepresas culturalas e sostener sectors estrategics coma lo de las TICs, l’agroindustria, los servicis e lo torisme. Lo Centre de Cooperacion Transfrontalièra HP-HP foguèt començat en l’encastre del projècte POCTEFA HP-HP, l’objectiu principal del qual èra potenciar e assolidar lo sector toristic en lo territòri transfrontalièr del Pirenèu Central.