Perqué contribua fòrtament al creissement e a l’emplèc de deman, la Recèrca revestís un enjòc economic màger. Constituís, amb la formacion, lo motor de l’economia de la coneissença, al còr de l’estrategia UE 2020, qu’orienta l’Union europèa cap a «un creissement intelligent, durable e inclusiu». Es egalament l’una de las accions prioritàrias de la Comunitat de Trabalh dels Pirenèus.
Conscients del dinamisme del sector scientific a l’escala del territòri, los membres de la CTP an lançat l’an 1996 una crida a projèctes Recèrca, finançat sus lors fons pròpris. Son objectiu: facilitar lo montatge de projèctes a l’escala europèa e la mesa en òbra d’accions integradas Sciéncia – Tecnologia – Entrepresa.
Renovelada cada annada, l’operacion permet a desparièras estructuras de tractar d’afars especificament pirenencs o de trabalhar sus problematicas comunas a l’ensemble del territòri de la CTP.
Al fial de las edicions, los tèmas an evoluit, los projèctes retenguts an levat de novèlas escomesas. Se son adaptats a las evolucions de las nòstras societats. En quinze ans, mai de 200 projèctes d’Investigacion son estats aital sostenguts mercés a l’atribucion de près de 10 milions d’èuros.
A l’escasença dels 15 ans de la Crida a projèctes Recèrca del Grop de Trabalh Recèrca de la Comission Formacion e desvolopament tecnologic, la CTP publica una brocadura sus las accions menadas en la matèria. Lo balanç aital presentat retraça 15 ans de collaboracion fructuosa entre investigadors e entrepreneires. Met l’accent sus d’iniciativas emblematicas qu’an desbocat a realizacions exemplaras. Soslinha l’engatjament fòrt de la CTP dins lo domeni de la Recèrca. Engatjament qu’a activament contribuat al desvolopament del territòri transfrontalièr e a son dardalhament europèu.
Telecargatz la brocadura en francés e en espanhòl
